DILI, STLTIMORLESTE.com – Inan isin rua sira tenke rutina halo kontrola saude no han ai-haan neebe nutritivu, atu nunee bebe neebe iha inan nia isin bele dezenvolve ho diak too loron moris.
Parteira Postu Saude Leohitu, Balibo, Petronela do Santos hatete, inan isin rua sira presiza halo kontrolu rutina ba sira nia saude no han ai-haan neebe iha nutrisaun, atu nunee bele hatene inan no oan nia kondisaun. Sekuandu la fo atensaun ba kontrolu pre natal nian durante isin rua, sei lori impaktu ba bebe nia kondisaun nomos inan bainhira partus.
Nia katak, aleinde nee inan isin rua sira tenke konsumu ai-haan nutritivu sira. Iha ai-haan nutritivu nee iha grupu 3 neebe presiza han durante isin rua mak ai-haan fo forsa hanesan batar, fos, aifarina no fehuk. Tuir fali ai-haan fo protesaun mak modo tahan, lakeru, tomate, senoura no aifuan no ikus liu mak ai-haan haburas hanesan ikan, naan, manutolun no susuben.
“Ami husi postu saude nian sempre halo promosaun ai-haan nutrisaun sira nee ba komunidade sira bainhira mai konsulta no dala ruma mos ami ba too sira nia fatin. Basa liu husi promosaun sira nee hodi fo konhesimentu diak ba inan isin rua sira,” dehan nia ba STL liu husi WA Tersa (21/07/2026).
Nia hatutan, liu husi promosaun kona ba ai-haan nutritivu, halo mos sosializasaun kona ba inan isin rua, inan fo susu no labarik idade husi 0 too fulan 59, no koalia mos kona ba moras sira hanesan dengue, ISPA, diarea no seluk tan.
Diretor Servisu Asistensia Klinika HNGV, Eligio de Araujo Soares hatete, bainhira inan isin sira ladun tau atensaun hodi kontrolu diak ba iha pre natal nian ho doutor espesialista sira, bele mosu infeksaun ruma. Husi buat sira nee hotu bele kontribui ba moras kontijentikal sira hanesan bebe moris moris mai ho problema sintina fatin no mi fatin tomak hodi halo bebe kabun bubu no seluk tan.
Nia afirma, moras kontijentikal sira nee akontese tanba kauza mos husi kondisaun mal nutrisaun, tanba durante isin rua inan sira la konsumu ai-haan neebe iha nutrisaun ba inan no bebe.
Diretor Servisu Saude Munisipiu Dili, Mateus Pinto hatete, inan isin rua sira presiza han ai-haan neebe iha nutrisaun. Ai-haan sira neebe iha Timor Leste nee orijin liu kompara ho nasaun sira seluk. Neebe importante ba inan isin rua sira atu konsumu ai-haan neebe nutririvu.
Nia hatutan, ekipa saude informa iha sentru saude sira sempre halo promosaun kona ai-haan nutritivu ba inan isin rua sira.
(dom)
