DILI, STLTIMORLESTE.com – Institutu Nasionál Kombate HIV-SIDA (INCSIDA) iha tinan 2025 foin primeira halao tan atividade sosializasaun kona-ba prevene moras HIV-SIDA nian ba komunidade Suku Akadirihun, Postu Administrativu Nain Feto, Munisipiu Dili.
“Ami mos ohin mai iha nee hanesan atividade primeiru ba tinan ida nee nian, tanba nee ami hili Suku Akadirihun sai primeiru ba ami nia atividade hodi sosializasaun kona-ba prevensaun ba moras HIV-SIDA nian Suku Akadirihun,” hatete Prezidente INCSIDA, Daniel Marcal liu nia diskursu wainhira halao atividade sosializasaun iha Sede Suku Akadirihun, Postu Administrativu Nain Feto, Munisipiu Dili, Tersa (18/02/2025).
Nia dehan, tinan ida nee atividade sosializasaun kona-ba moras HIV-SIDA hahu husi Suku Akadirihun, depois ba fali Suku sira seluk.
“Ami nia atividade nee hahu husi Suku Akadirihun, tanba ami haree katak iha ninia liderasan sira nee povu bele fo kontinua konfiansa nafatin hodi dezenvolve informasaun sira neebe importante tebes atu asegura nia ema,” nia esplika.
Prezidente INCSIDA nee informa, atividade ida nee sei halao nafatin iha Suku, Aldeia neebe eziste iha Munisipiu Dili, tanba problema HIV laos iha Suku Akadirihun deït, maibe iha problema HIV iha sosiedade nia leet.
Iha fatin hanesan, Xefe Suku Akadiruhun, Postu Administrativu Kristu Rei, Munisipiu Dili, Juvinal da Conceição koalia, moras HIV-SIDA numeru aumenta ba beibeik, tanba nee husu ba komunidade sira liu-liu juventude sira tenke tuir atividade kona-ba prevensaun HIV-SIDA nee too hotu, atu nunee bele komprede no halo prevensaun ba moris loron-loron nian.
Nunee mos Komunidade Julia Rodriques hatete, INCSIDA nia atividade fahe informasuan kona-ba prevensaun HIV-SIDA nee importante tebes ba joven sira, tanba nee INCSIDA tenke esforsu hodi ba Suku no Aldeia sira iha Munisipiu 14 inklui RAEOA.
(jen)
