DILI, STLTIMORLESTE.com – Institutu Nasional Formasaun Profesor no Profisional Edukasaun (INFORDEPE) realiza workshop ba elaborasaun planu estratejiku 2026 too 2030.
Sekretariu Estadu Ensinu Sekundariu Jeral no Ensinu Sekundariu Tekniku Vokasional, Domingos Lopes Lemos hatete, ho onra boot nia hahu serimónia abertura workshop ba elaborasaun planu estratejiku INFORDEPE Timor Leste 2026-2030 nian.
“Hau hakarak hahu hodi agradese ba ema hotu neebe prezente, tanba fo tempu no esforsu hodi kontribui ba eventu importante ida ne’e. Ita boot nia partisipasaun esensial ba susesu workshop ida nee nian,” haktuir Domingos Lopes Lemos ba jornalista sira liu husi nia diskursu no ofisialmente loke workshop ba elaborasaun planu estratejiku INFORDEPE 2026-2030 iha salaun Ian Martin Balide, Tersa (11/02/2025).
Nia dehan, aleinde nee hakarak hatoo agradesimentu espesial parseiru dezenvolvimentu sira, liu-liu Australia no Nova Zelándia, neebe sira nia esforsu no kolaborasaun inkansavel sai hanesan instrumental hodi avansa nia sistema edukativu nian.
“Ita boot sira nia dedikasaun no apoiu kontinua folin boot, no ami agradese tebes ba buat hotu neebe ita boot sira halo ona no kontinua halo ba edukasaun iha TL. Workshop ida nee reprezenta marku signifikativu ida iha ami nia viajen ba hametin no dezenvolve instituisaun INFORDEPE,” nia katak.
Tuir nia, elaborasaun planu estratejiku ba INFORDEPE ba tinan lima oin mai nuudar prosesu vital ida neebe sei define diresaun no prioridade ba formasaun profesor sira, hadia kurrikulu no kualidade edukasaun iha rai laran.
Nia hatutan, kolabora besik hodi identifika INFORDEPE nia dezafiu prinsipal no oportunidade ba hadia sistema edukativu. Implementa ho efetivu no efikas, estabelese objetivu sira neebe klaru no bele atinji neebe sei orienta dirijenti INFORDEPE nian ba futuru edukasional ida neebe promisor liu.
“Ami iha konfiansa katak, liu.husi servisu hamutuk no espiritu kolaborativu, kompetensia ida INFORDEPE nian, sira sei bele kria planu estratejiku ida nee. Ami hein katak dokumentu ida nee reflete laos deit aspirasaun Ministeriu Edukasaun nian, maibe mos nesesidade lo-loos husi ita nia estudante no profesór sira. Hau agradese dala ida tan ba ema hotu-hotu ba imi nia kompromisu no dedikasaun hamutuk, ita bele forma futuru edukasaun iha Timor Leste. Hau hein katak ida nee sei sai eventu ida neebe produtivu no inspirativu ba partisipante sira hotu,” katak nia.
Nia akresenta, INFORDEPE nia objetivu prinsipal mak atu investe iha formasaun ba profesor eskola primaria no sekundaria sira. Investimentu ida nee esensial atu asegura katak edukador sira preparadu ho di’ak atu hasoru dezafiu sira iha klase laran no fornese edukasaun ida ho kualidade ba estudante sira.
Iha fatin hanesan, Prezidente INFORDEPE, Domingos Martins hatete, planu estratejiku ba ohin nee ninia objetivu mak atu hadia futuru formasaun INFORDEPE nian, liu-liu ba tinan 5 oin mai, atu nunee bele garante katak iha formasaun neebe ho kualidade.
(jac)
