DILI, STLTIMORLESTE.com – Institutu Nasional Farmasia Produtu Mediku (INFPM) iha loron 16 fulan Janeiru halo destroisaun ba aimoruk, konsumaveis no ekipamentu laboratoriu hamutuk item 165, iha Lixeiru Suku Oenunu, Postu Administrativu Metinaro, Munisípiu Dili.
”Ohin loron Sesta, 17 Janeiru, ita halo destroisaun ba aimoruk, konsumaveis no ekipamentu laboratoriu nian hamutuk item 165 iha lixeiru Suku Oenunu, Postu Administrativu Metinaro, Munisípiu Dili,” hatete Diretor Ezekutivu Institutu Nasional Farmasia Produtu Mediku (INFPM), Brigido Dias ba jornalista sira iha nia knaar fatin INFPM, Segunda (20/1/2025).
Aimoruk sira nee tuir nia prazu liu nee hahu 2020- 2024 no tuir politika Ministeriu Saude (MS) presiza halo destroisaun, atu nunee la bele fo impaktu ba ema nia saude no ambiente.
“Husi 2024 ita halo destroisaun ho aimoruk neebe ho kuantidade boot no aimoruk nee rasik laos ita sosa iha tinan ida deit, maibe nee akumulasaun husi 2020-2024, entaun akumulasun nee laos husi OJE, maibe doasaun husi ita nia parseiru ka doador sira hanesan OMS, UNICEF no UNFPA neebe mak durante nee ita akumula husi situsaun Covid -19 nian,” nia esplika.
Maibe nia dehan, husi drstroisaun nee dala barak publiku preokupa, tanba ho item neebe barak, maibe ida nee laos tinan ida nian, nee akumulasaun husi 2020 mai too fulan Dezembru 2024.
No aimoruk neebe liu prazu, tanba Governu prepara ba surtu, ezemplu surtu ida mai prepara aimoruk barak tiha hanesan Covid-19 ema hotu tauk, doador sira mos apoiu fo barak tiha, depois surtu nee hotu sasan sira nee atu uza ba saida, entaun INFPM rai deit too prazu liu.
Entretantu dadus neebe jornalista STL asesu husi aimoruk destroisaun nee orsamentu hamutuk US$ 1,332,904,81, nee sosa ho OJE nian hahu husi 2020-2024 ho orsamentu total US$ 438,892,70 ho nia item hamutuk 127, depois Fundo Global orsamentu hamutuk US$ 25,758,73 ho item 12, UNDP ho orsamentu hamutuk US$ 8,065,40 ho item lima, husi OMS ho orsamentu hamutuk US$ 225,956,54 ho item sia, UNFPA ho orsamentu hamutuk US$ 168,302,51 ho item neen, husi UNICEF ho orsamentu hamutuk US$ 465,928,93.
Aleinde nee husi destroisaun nee mai husi INFPM, Klinika Stanford, Ministeriu Saude (MS), FALINTIL – Forsa Defeza Timor Leste ( F-FDTL) no Hospital Nasional Guido Valadares (HNGV).
(jen)