BAUKAU, STLTIMORLESTE.com – Inisiu tinan 2025, Delegasaun Territorial Florestal, Kafe Plantas no Industria (DTFKPI) liu husi sentru viveru rua distribui ai-oan hamutuk rihun 24 ba komunidade sira iha Munisipiu Baukau.
Xefe Departamentu DTFKPI Munisipiu Baukau, António José Lopes esplika, inisiu tinan 2025 too fulan Junhu nee, parte DTFKPI Baukau liu husi Membru Korpu Guarda Florestal (CGF-sigla português) halo patrulhamentu rutina kontrola sidadaun sira neebe tesi ai no tula ai sein konhesimentu no autorizasaun husi DTFKPI.
Aleinde mos kobre Postu Administrativu sira siensibiliza lei Florestal nian ba Autoridade Suku inklui re-florestasaun liu husi distribuisaun ai-oan ba komunidade sira iha nivel Postu Administrativu hodi kuda iha toos laran no fatin risku sira.
“Distribuisaun ai-oan nee ita prepara 24 mil Ps ita distribui hotu ona ba komunidade sira iha Baukau laran tomak,” hateten António José Lopes ba jornalista sira iha Vila Nova Baukau, Kinta (05/06/2025).
Nia sublina, husi ai-oan neebe parte DTFKPI Baukau distribui kompostu ai-mahoni, ai-gaharu, ai-teka, ai-kakeu no seluk tan neebe relevante tuir kriteira florestal nian durante viveru iha sentru viveru Suku Triloka Postu Bakau Vila no sentru viveru Suku Saelari Postu Laga.
Nia fundamenta, durante distribuisaun parte DTFKPI servisu hamutuk ho parseiru dezenvolvimentu CRS no World Vision Timor Leste inklui atende tuir pedidu husi komunidade sira neebe iha vontade hakarak kuda ai-oan.
“Ba hirak neebe foti ai-oan ita monitoring nafatin liu husi hameno ba sira tuir kriteiru loloos tenke iha lutu para animal labele estraga,” António akresenta.
Nia argumentu, ai-oan hirak neebe durante distribui ba komunidade sira kuda, tuir observasaun komunidade barak vontade kuda ai-oan, nee suporta servisu DTFKPI, maibe seidauk atinji metas, tanba seidauk natoon.
Tuir nia, DTFKPI iha planu atu re-florestasaun hodi atinji metas liu husi kuda ai-oan barak liu tan, maibe planu labele realiza, tanba difikulta iha lokalizasaun.
“Ita hatene rai sira mamuk atu implementa programa sira hanesan uluk rai Estadu nian nee para ita konserva no re-florestasaun, maibe susar, tanba nee ita koordena ona Autoridade sira fasilita rai para ita konserva no re-florestasaun” katak António.
Xefe Departamentu DTFKPI nee hateten, inisiu tinan nee membru CGF Baukau patrulha rejista kazu ilegal tesi ai no faan ai-kameli hamutuk lima neebe daudaun rejistu ona iha Ministeriu Publiku, hein kontinua ba prosesu iha Tribunal.
Aleinde mos kaptura ai-komersial hamutuk estapa 26 no ai-kabelak hamutuk kubiku 8 neebe daudaun asegura iha edifisiu no tuir planu sei submete ba prosesu lelaun iha tempu badak.
(tom)
