DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Governu sei halo lei hodi garante investor sira bele mai investe iha rai laran, maibe tenke halo lei tuir Asosiasaun Nasoins Sudeste Aziatiku (ASEAN) nian.
Kestaun nee Xefe Governu hatoo hodi responde kona-ba Prezidente Republika, Jose Ramos Horta neebe hatete nia lobi investor barak hakarak mai investe iha Timor Leste, maibe Governu mak la halo lei hodi garante investor sira.
“Ba aprende saida mak WTO ami tenke halo lei haruka ba Parlamentu hodi hatene buat sira nee hotu, ita laos dehan mai ona mai ona, ita tenke tuir lei ASEAN nian mos, horiseik lokraik tuku 6:30 mak hotu, tanba tama ba ASEAN tenke tuir kriteria iha 7 too ona 70%, balu seidauk too 40 enjeral 50% nee mak horiseik ami koalia iha Konselhu Ministru ba Ministeriu sira bele ou tenke hamutuk ho Ministeriu Negosiu Engtranjeiru no Kooperasaun hodi halo lalais tiha buat sira neebe ita halo ona,” hatete PM, Xanana.
Xefe Governu hatutan, bainhira halo lei sira nee hotu ona Malazia bele simu ona, Timor Leste iha tinan mai nee iha kedas inisiu la hein too fali fim do anu.
Nunee mos iha Konselhu Ministru kuarta horiseik Visi Ministra ba Asuntu ASEAN, Milena Maria da Costa Rangel aprezenta ba Konselhu Ministru atualizasaun kona-ba prosesu adezaun Timor Leste nuudar membru plenu ba ASEAN, neebe nia konkretizasaun prevee ona ba tinan oin mai.
Prezidente Republika (PR), Jose Ramos Horta hatete, durante nia viajen estadu ba nasaun oin-oin lobi investor atu halo investimentu iha Timor Leste (TL), maibe Governu mak la halo lei protesaun ba investor, tanba nee investor sira la mai.
Prezidente hatete, investor barak hakarak halo investimentu iha TL, maibe sira husu presiza iha lei ruma hodi garante ba investor, maibe too agora Governu seidauk halo. Ho ida nee mak investor sira too agora seidauk bele mai halo investimentu iha TL.
(eme)
