DILI, STLTIMORLESTE.com – Irma nain 7 husi Kongresaun das Irmas Virgem Maria do Monte Carmelo (Irmas Carmelitas) mak hanesan Isabel Madeira Ximenes, H.Carm, Deolinda Pereira Ximenes, H.Carm, Natalina dos Reis, H.Carm, Pedrolina Maria Florinda, H.Carm, Maria de Fatima, H.Carm, Ermelinda de Jesus Marcal, H.Carm, Zeza Miquelina Barros de Jesus, H.Carm husi simu Profisaun Votus Perpetua, hatan ba Nai nia bolu hodi servi.
Selebrasaun profisaun votus perpetua halao iha Igreja Santo Antonio Motael, misa prezide husi Arsebispu Arkedioseze Metropolitana Dili, Dom Virgilio Cardeal do Carmo da Silva, SDB akompanha husi Delegadu Provinsial Austrália no Timor Leste, Padre Roque Soares da Cruz, O.Carm no Vigariu Episcopal Asuntu Sosial Arkedioseze Dili, Padre Aniceto Maia da Costa, O.Carm nomos com selebrante sira, no hananu furak responsavel husi Irma Carmelitas Frater no aspirante sira.
Votus perpetua mak madre sira fo sira nia aan tomak ba Maromak, iha kongresaun relijioza ida atu servi Maromak.
Iha selebrasaun misa profisaun votus perpetua nee partisipa husi familia irmas nain 7 nian Madre no sarani sira.
“Haksolok ita hamutuk ho familia boot Irma Carmelitas sira, tanba Maromak nia domin liu husi feto ran nain 7 sira nia hatan hau bolu o, hau nia Maromak bolu tan hadomi, oinsa ita bele sukat Maromak nia domin misteriu nee, iha moris liu-liu irma nain 7 hatan ba bolu ida liu husi profisaun perpetua, nia bolu tanba nia fiar hanesan uluk Maromak promote ba Izaias ohin Maromak koalia ba ita hotu rona nia lian liu-liu ba irma nain 7 keta tauk, tanba laos imi mak buka hau, maibe Maromak mak bolu no konvida imi, keta tauk sim ba Nai,” hatete Dom Virgilio liu husi omilia wainhira prezide misa iha Igreja Santo Antonio Motael, Sabddu (4/07/2026).
Tanba nee, selebrasaun ohin konvida sarani sira hola parte iha Profisaun Irmas sira nian fo hanoin kona ba misteriu vokasaun liu-liu vokasaun konsagradu mai no haree atu kontinua deskobre haklean beleza moris konsagrada nia.
“Maromak hili imi atu moris iha Kristu oinsa moris tuir Konselhu evanjelhu la oras Irma nain 7 mai hakneak iha oin kompromete moris hanesan Kristu neebe obdente halo tuir too mate iha Cruz, moris hanesan Kristu pobre kiak, moris hanesan Kristu ho laran mos, moris hanesan Kristu modelu iha komunidade,” hatete Dom Virgilio.
Iha fatin hanesan, familia Helio Soares nuudar aman sente kontente, basa Maromak hili oan ida ba dalan vokasaun relijioza nian, tanba nee familia nafatin halo orasaun ba nia atu nunee fiel nafatin vokasaun ida nee hodi servi Maromak,” dehan nia.
Nia agradese ba kongresaun bele eduka sira durante tinan barak too ohin loron, hodi hatan ba Nai nia bolu.
Entretantu Madre Zeza Miquelina Barros de Jesus H.Carm hatete, votus perpetua laos signifika boot iha konsagrada maibe votus perpetua mak pasu dahuluk lori ami hatan ba Maromak hodi sarani aan totalmente ba Nai nia bolu,” hatete Ir.
Irma nain 7 simu Profisaun votus perpetua nain 6 husi Ermera no nain ida husi Covalima.
(joa)
