DILI,STLTIMORLESTE.com – Govenu Japaun liu husi Embaixador Japaun iha Timor Leste servisu hamutuk ho Fundu Nasoins Unidas (UNICEF) ba labarik entrega ona bee no saneamentu no instalasaun ba Sentru Saude Komunitaria 10, neebe iha Munisípiu Lautem no Rejiaun Administrativu Espesial Oekusi Ambeno.
Embaixadór Japaun iha Timor Leste (TL), Kimura Tetsuya hatete, Governu Japaun sente haksolok tebes atu partisipa iha serimonia entrega ba fasilidade neebe bee saneamentu hadia, oinsa iha Sentru Saude komunitaria hamutuk 10 iha Munisípiu Lautém no Rejiaun Administrativu Espesiál Oekusi Ambeno.
“Primeiru hau hakarak hatoo hau nia agradesimentu wain ba ema hotu-hotu neebe mak envolve iha inisiativa importante ida nee, fasilidade sira iha bee saneamentu nian neebe ohin ami entrega hola parte iha projeitu hadia, nutrisaun labarik nian, neebe mak Japaun finansia ona dezde tinan 2022 ho kontribuisaun totál milhaun US$ 3,” hatete Embaixadór Japaun iha Timor Leste (TL), Kimura Tetsuya ba jornalista sira iha Hotel Novo Turizmu, Segunda (24/02/2025).
Nia esplika, iha tinan tolu nia laran, projetu nee implementa ona atividade oin-oin iha Munisípiu Kovalima, Lautem, Manufahi, Likisa no Oekusi, mak hanesan fornese asistensia saude ba labarik rihun sanulu 10 resin neebe afetadu husi malnutrisaun aguda.
“Oferese akonselhamentu ba inan no kuidadu nain liu rihun 10 fornese suplementasaun mikronutriente oin-oin ba bebe sira, hadia kualidade ai-haan husi labarik feto adolexente sira, disponibiliza ka fornese servisu bee no saneamentu ba sentru saude komunitaria no eskola sira,” nia esplika.
Iha fatin hanesan, Reprezentante UNICEF iha Timor Leste, Ainhoa Jaureguibeitia informa, UNICEF sente onra tebes bele marka prezensa iha serimonia entrega fasilidade bee no ijiene iha Sentru saude komunitariu 10 iha munisípiu rua.
“Hau sente onra tebes bele marka prezensa iha serimonia entrega fasilidade Bee Saneamentu no Ijiene (BESI) iha Sentru Saude Komunitaria hamutuk 10 iha Munisipiu Lautem no Oekusi,” katak nia.
(jen)
