DILI, STLTIMORLESTE.com – Jesus hatete ema neebe hetan Nia bainhira buka Nia ho fuan no laran tomak, loron ida sei hetan Nia iha moris.
Padre Paul Kerans SVD ba jornalista STL, Kuarta nee (15/07/2026) hatete, refleksaun ba loron ohin foti husi evanjelhu, Mateus 11:25-27, Jesus revela ninia relasaun intima ho Maromak.
Iha evanjelhu ohin nian, Jesus revela ninia relasaun íntima ho Maromak, kriador lalehan no rai nian. Nia bolu Yahweh El Shaddai nuudar Nia Aman, buat ida neebe mak laiha presedente iha tempu neeba. Maibe Nia ho aten barani bolu Maromak nuudar nia Aman rasik.
Padre Paul hatutan tan katak, so ema neebe hatene didiak Maromak mak bele halo ida nee. Hodi bolu Maromak Aman, Nia hatudu ninia konhesimentu klean konaba Maromak. Tanba nee mak Nia bele deklara katak la iha ema ida mak hatene Aman, so nia deit, tanba Nia mak Maromak nia Oan.
Ema neebe laiha relasaun intima ho Maromak sei labele hetan Maromak iha nia moris, tanba se hakarak hetan Maromak tenke buka ho fuan no laran.
“Hatene Maromak mak matenek no komprensaun neebe aas liu. Ita labele hetan ida nee, se ita la iha relasaun íntima ho Maromak. Tanba Maromak deit mak buat hotu hotu nia hun. So sira neebe Jesus hakarak fo ba sira mak sei simu matenek. Maibe Jesus respeita ema. Se ita hakarak duni atu hatene Nia, Nia sei hatudu Nia aan. Imi sei hetan Hau se imi buka Hau ho imi nia fuan tomak, entaun imi sei hetan Hau. (Jeremias 29:13 ),” dehan Padre.
Tanba nee Padre husu ema hotu labele duni tuir mundu nia hakarak deit maibe buka Maromak kalan loron nunee bele hetan Maromak iha ema nia moris.
“Keta duni tuir mundu nia matenek. Envezde, ita brani atu sai haraik aan hodi simu lia loos boot liu hotu katak ita sei haree, konese, no hadomi husi ida neebe iha matenek no komprensaun tomak. Mai ba Aman neebe hein hela ita. Iha nia, ita sei hetan buat neebe ita buka duni,” dehan Padre.
Bibi Atan Kreda Katolika nee dehan, bele halo servisu seluk maibe keta haluha Maromak iha ema nia vida, no tau Maromak primeiru antes halo atividade seluk.
Bainhira halo atividade ruma husu Maromak nia prezensa iha moris hodi hatudu dalan nunee bele lao tuir buat neebe Maromak hanorin, no buka hadook aan husi hahalok neebe bandu husi ukun fuan Maromak nia, no halo tuir ukun fuan neebe Maromak hanorin.
Tanba nee bainhira buka Maromak ho fuan no laran tomak, no hadomi Maromak no hadomi ema seluk hanesan aan rasik, sei hetan Maromak, no sei hetan grasa no bensaun ba buat neebe ema idak idak husu iha nia moris rasik, tanba nee nafatin laran metin iha Maromak buat hotu sei lao ho diak.
(eme)
