DILI, STLTIMORLESTE.com – Jesus hakarak ema tau esperansa iha Maromak, maske hasoru situasaun saida deit iha vida moris, nafatin tau konfiansa iha Maromak.
Hatete Padre Richardo Pasang, SVD ba STL via WhatsApp, Tersa (21/01/2025), liu husi nia refleksaun diaria semana II do tempu komum Memoria obrigatoriu Santa Ines, virgem e martir Heb. 6 : 10 – 20 Marc. 2 : 22 – 28.
“Iha moris sosiedade, ita sempre hasoru ho lei no regulamentu. Objetivu prinsipal aplikasaun lei no regulamentu atu atinji bonum commune. Dala ruma ita hasoru lider ida neebe flexibel no konsidera ho sentimentu humana hodi haree povu sira nia moris. Maibe akontese mos iha lideransa neebe iha tendensia legalista no des-humanu,” dehan Padre.
Nia katak, evanjelhu ohin loron aprezenta istoria kona-ba komunidade iha tempu Jesus nian. Wainhira Jesus ho Nia eskolante sira liu husi toos trigu nian iha loron Sabadu ida. Eskolante sira hamlaha no hili trigu fulin hodi han. Asaun husi eskolante sira nee sai problema entre Jesus no Farizeu sira.
Eskolante sira mak hamlaha no hili trigu fulin hodi han, maibe Farizeu sira fo sala ba Jesus ho sira nia perguntas haree took ba, oinsa mak sira halo servisu iha loron Sabadu be bandu. Hafoin, Jesus Kristu fo hanoin sira relasaun ho istoria David nian ho nia emar sira wainhira sira hamlaha no tama iha Nai nia uma hodi han paun neebe rai hela iha fatin santu neebe nailulik sira deit mak bele han.
“Husi liafuan hirak nee, Jesus hakarak sublina katak Nia aan rasik mak nain ba loron Sabadu! Se nunee, saida mak ita halo, kuandu Jesus rasik mak loron Sabadu nia Nain? Jesus hakarak atu ita sempre iha esperansa ba Maromak iha situasaun saida deit neebe ita hasoru. Iha surat ba Hebreu sira hateten katak iha esperansa, nee ita iha besi tali klamar nian ida metin no mahein diak ba ita mak Jesus nuudar ita nia mata-dalan, nunee tuir Melquisedec nia ukun, Nia sai ita nia Nailulik rohan laek,” dehan Padre.
Bibi atan kreda katolika nee dehan, Santa Ines neebe komemora loron ida ohin hateten “Kristu hafutar furak tiha hau nia klamar ho murak mean nabilan kmanek no virtude. Hau mak Nai nian neebe servidu pelu Anju sira. (Kristus telah membuat jiwaku indah dengan permata kasih karunia dan kebajikan. Saya adalah milik Dia yang dilayani oleh para malaikat),” dehan nia.
Iha biban nee, Padre harohan Nai Maromak haraik fuan neebe sempre nakloke ho esperansa ba Jesus Boot rasik.
Padre hatete, iha moris sempre hasoru tentasaun mundu nia no hasoru buat oin oin iha moris maibe Jesus ema hotu hotu nafatin tau komfiansa iha Kristu, tanba Nain mak hun no rohan laek ba ema no buat hotu.
(eme)