DILI, STLTIMORLESTE.com – Padre Paul Kerans, SVD hatete, Jesus sempre laran sadia ba ema kiik no kiak sira no ema sira neebe marjinalizadu.
Padre Paul Kerans, SVD hatoo lia hirak nee ba STL Tersa (07/07/2026) hatete, evanjelhu ba loron ohin foti husi Mateus 9:32-38 husi evanjelhu nee iha pontu rua, ida mak konaba Jesus nia laran sadia, segundu mak Jesus fahe nia aman nia kbiit iha lalehan.
“Iha evanjelhu ohin nian, iha pontu rua atu ita reflete. Pontu primeiru mak kona-ba Jesus nia laran-sadia. Nia sente laran sadia ba ema kiak sira, ema moras sira, ema sira neebe hetan opresaun, no ema sira neebe marjinalizadu,” dehan Padre Paul.
Padre dehan, Jesus laran sadia ida nee dudu Nia atu duni sai demoniu sira, hanorin, haklaken, no kura moras no moras oioin.
“Pontu daruak mak konaba fahe, maski Jesus fahe ninia Aman nia kbiit iha lalehan, maibe Nia la bele halo ida nee mesak. Nia presiza traballador sira atu ajuda Nia. Nia bolu ita atu halo ita nia parte. Nia hakarak fahe ho ita servisu balu iha ninia toos uvas,” dehan Padre.
Padre haktuir tan katak, ema ida idak presiza iha konsiensia ema idak idak mos hola parte ona iha iha misaun nuudar Profeta haklake liafuan Maromak nia, no hadok aan husi hahalok aat sira.
“Ita presiza hanoin no iha konxiensia katak ita kria ho misaun ida, no ita halo parte iha misaun nee, partisipa iha serbisu neebe Jesus, Nain toos uvas nian, konfia mai ita. Ita mos hola parte iha Ninia misaun nuudar profeta, amlulik no liurai. (Ebreu 1:1-3) Jesus uza metafora kolleita nian atu hatudu mai ita serbisu salvasaun nian neebe seidauk hotu,” dehan Pe Paul.
Bibi atan kredak katolika nee dehan, iha ema milhaun resin iha ema nia mundu ohin loron neebe sei moris iha kiak nia laran, millaun sira neebe laiha uma no la edukadu, no millaun sira neebe presiza kuidadu ospitál nian.
“Liu liu, iha milhaun sira neebe presiza nafatin atu hetan evanjelizasaun. Ita mos iha laran-sadia ba sira hanesan Jesus ka lae? Jesus kuda fini esperansa nian iha tinan 2.000 liu ba, no kolleita sai barak. No agora, se mak sei ba no serbisu iha Jesus toos? Nia bolu ita no fahe ninia misaun ho ita,” hakotu.
(eme)
