DILI, STLTIMORLESTE.com – Fuan Mizerikordiozu mak identidade Jesus nian nuudar Nai lulik boot, tanba Jesus entrega nia aan tomak ba salvasaun ema iha situasaun saida deit.
Padre Richardo Pasang, SVD hatoo lia hirak nee ba STL liu husi WhatsApp, Kuarta (22/01/2025).
Padre nee dehan, maske ema kritika, maske ema la simu, maske ema fo sala, ameasa, maibe Jesus nafatin halao misaun atu salva ema neebe presiza Nia tulun.
Tanba dala ruma hatudu ba ema habitu ida neebe ema halo ho konsiensia ou lae, katak sai observador neebe mosu derrepente (momental) deit ba ema sira neebe halao servisu ruma. Husi nee, sira bele halo avaliasaun kritika, desprezu maibe oituan deit apresiasaun, maske sira halo servisu diak ruma ba ema neebe presiza. Ema hanesan nunee, haluha mos katak ema seluk haree hela sira.
Jesus Kristu hasoru situasaun nunee wainhira halo diak ba ema ruma iha loron Sabadu, iha sinagoga Jesus fo isin diak ba mane ida be liman ida maten. Farizeu hatene ona katak Jesus nakonu ho mizerikordia ba ema neebe terus no susar. Tanba nee, sira haree, sira sai observador, karik Jesus fo isin diak ba ema nee iha loron Sabadu. Ho nunee, sira iha razaun atu bele kesar Nia.
Jesus mak Nain ba loron Sabadu. Tan nee, Nia barani fo isin diak ba mane liman ida maten iha loron Sabadu. Nia la tauk kritika husi ema seluk, liu-liu husi Farizeu sira. Jesus halo diak ba ema neebe terus. Maibe, Farizeu no ema Herodes ninia emar sira futu lia atu oho Jesus. Jesus la tauk, Jesus la hakiduk.
“Fuan mizerikordiozu mak identidade Jesus nian nuudar Nai lulik Boot. Jesus entrega Nia aan tomak ba salvasaun ita ema iha situasaun saida deit. Maske ema kritika, maske ema la simu, maske ema fo sala, ameasa, maibe Jesus nafatin halao misaun atu salva ema neebe presiza Nia tulun. Nee duni, surat ba Hebreu hateten: Tebes duni, Jesus, tuir Melquisedec, Nia mak ita nia Nailulik. Nia sai Nailulik la tuir lei mundu nian, maibe tuir Maromak Nia moris neebe rohan laek,” katak Padre Richardo.
Padre Richardo hatutan, perguntas ba ema serake sempre prontu fo tulun ba maluk sira, maske sei hetan ameasa seriu ou ba nia aan ”Ita husu ba Maromak atu haraik espiritu aten barani atu bele fo tulun ba ema kiik, la iha kbiit, kiak, ema hanehan no difabel sira,” dehan nia.
Bibi Atan Kreda Katolika nee husu sarani nafatin tau fiar iha Jesus, tanba nia mak salvasaun ba ema bainhira hasoru susar iha nia moris.
(eme)