DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial PdCB hanesan laen, neebe komete krime hasoru lezada inisial EOL hanesan feen.
Iha indisus sufisiente katak, iha loron 12 fulan Junu tinan 2024, haleu oras tuku 18:30, OTL, iha Kampung Alor Dili, arguidu PdCB nervozu lori liman tuku ho makas dala ida kona iha ofendida nia matan fukun parte karuk, basa dala barak kona iha ofendida nia hasan parte karuk, arguidu tuku ho makas dala ida kona iha ofendida nia tilun hun parte karuk, halo ofendida monu ba rai, arguidu tebe dala barak kona iha ofendida nia kotuk laran, no lori sama ofendida nia kotuk laran.
Konsekuensia direta husi arguidu nia hahalok ofendida hetan moras makas iha matan fukun parte karuk, moras iha hasan parte karuk no los, moras iha kotuk laran no bubu, moras iha tilun hun parte karuk, bubu no ran sai uitoan.
Ofendida ba halo tratamentu iha PRADET.
Kauza husi problema nee, tanba arguidu fila husi Maliana mai Dili haruka bin nia oan feto bolu ofendida, maibe ofendida dehan hein lai, arguidu nafatin bolu ofendida, maibe ofendida dehan nafatin hau joga karta hotu mak ba.
Arguidu PdCB halo ho forma livre, deliberada no konsientemente hatene katak, lori liman tuku ho makas dala ida kona iha ofendida nia matan fukun parte karuk, basa dala barak kona iha ofendida nia hasan parte karuk.
Arguidu tuku ho makas dala ida kona iha ofendida nia tilun hun parte karuk, halo ofendida monu ba rai, arguidu tebe dala barak kona iha ofendida nia kotuk laran, no lori ain sama ofendida nia kotuk laran, nudar meiu nebe aptu hodi hamosu ofensa ba lezada nia isin lolon no saude.
Arguidu hatene katak, nia hahalok nee, proibidu no punidu tuir lei penal.
Tanba nee Konstitui arguidu nudar autor material ho forma konsumadu ba pratika krime ofensa ba integridade fizika simples ho forma violensia domestika previstu no punidu tuir artigu 145 husi Kodigu Penal. Konjuga ho artigu sira 2, 3 alinea a) no artigu 35 alinea b) husi Lei Kontra Violensia Domestika numeru 07/2010, loron 07 fulan Julhu.
Hatan ba faktus nee arguidu konfesa katak, halo duni agresaun hasoru lezada. Arguidu esplika momentu neeba arguidu foin fila husi Maliana, to iha uma lezada la iha uma maibe lezada sai ba joga hela karta.
Arguidu deklara, depois arguidu haruka ba bolu lezada atu mai halo kafe ba sira hemu, maibe bolu dala rua lezada lakohi mai. Ho ida nee mak arguidu nervoju ba dada lezada mai uma, no ikus mosu agresaun.
Arguidu deklara, hahu husi neeba to mai agora la iha tan problema ona, lezada mos la joga ona karta.
Lezada mos haforsa tan akuzasaun neebe iha katak, motivu arguidu baku lezada tanba lezada ba joga karta, no la halo kafe.
Rona tiha deklarasaun, Tribunal husu atu tama ba iha faze alegasaun.
Iha alegasaun, MP husu Tribunal atu aplika pena multa ba arguidu, tanba arguidu ho lezada diak malu ona.
Enkuantu husi parte defeza nian, husu Tribunal atu aplika pena neebe justu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Singular Jumiati Freitas, Ministeriu Publiku reprezenta husi Prokuradora estajiada, arguidu hetan asistensia legal husi Defensor Publiku Manuel Exposto.
(ter)
