DILI, STLTIMORLESTE.com – Atividade jogu online ilegal neebe deskonfia halao husi sidadaun estranjeiru liu-liu Xina sira iha rai laran, nuudar ameasa boot ba seguransa komunidade no foinsae sira, maibe Antigu Deputadu husi Bankada Partidu Sosial Demokrata (PSD), Leandro Isaac, kestiona makaas husi silensiu lider politiku sira neebe hili deit atu tuur nonok no fase liman hodi lakohi foti asaun rigorozu.
Nia dehan, atividade hirak nee lori ameasa boot ba seguransa komunidade no kria instabilidade sosial, liuliu fo impaktu negativu ba foinsae timor oan sira tanba bele estraga sira nia mentalidade, finansa, no dada sira lakon foku ba estudu tanba involve an iha pratika jogu ilegal nee.
“Jogu Online ilegal sira hanesan nee mosu sei fo ameasa no fo impaktu negativu tebes ba futuru foinsae sira nian, tanba nee labele nonok deit,”dehan Leandro Isaac ba STL, iha nia rezidensia, Díli, Kinta (09/07/2026).
Iha nia komentariu, Leandro Isaac mos kestiona posizaun no integridade husi lider partidu sira hakarak hamutuk, maibe realidade hatudu buat seluk.
“Sira lider sira nee hakarak hamutuk maibe ho se, sira mesak deit mos lakohi halo buat ida, nunee halo atividade jogu online ilegal hirak nee buras iha ita nia rai,”dehan nia ho lian kroat.
Antigu Deputadu nee haktuir tan katak, maski iha preokupasaun boot konaba seguransa Nasional, maibe lider politiku sira hatudu hahalok deit atu nonok, hodi husik kestaun (atividade jogu online ilegal) neebe akontese daudaun nee laiha solusaun.
Ho nunee nia husu ba parte kompetente, liuliu governu no seguransa, atu foti medida rigorozu hodi hapara atividade ilegal sira nee, hodi labele fo ameasa boot liu tan ba futuru nasaun nian.
Iha parte Observador Politika, Manuel Soares konsideira katak preokupasaun neebe hatoo husi Antigu Deputadu Leandro Isaac nuudar kestaun neebe seriu tebes no presiza duni atensaun urjente husi Governu liuliu parte seguransa.
Tuir nia, silensiu husi forsa politiku sira, tantu husi parte governu no oposizaun mos bele kria fali duvida iha publiku nia leet konaba oinsa Governu kontrola no foti desizaun ba kazu krime husi rai liur sira neebe bele estraga estabilidade iha rai laran.
Entretantu Akademista UNTL, Santiago da Silva, fo hanoin katak kazu hirak nee hatudu frakeza iha sistema monitorizasaun ba sidadaun estranjeiru sira, neebe tama ho vistu turizmu maibe ikus mai halao fali atividade kriminal.
(car)
