DILI, STLTIMORLESTE.com – Tribunal Judisial Primeira Instansia Dili (TJPID) iha loron Sabadu (11/07/2026) halao prosesu primeiru interogatoriu ba kazu jogu online Scamming Call Centre, neebe foin lalais polisia detein iha Manleuana.
Arguidu nain rua nulu resin sia nee (29) Ministeriu Publiku (MP) neebe reprezenta husi Prokurador Domingos Gouveia Leite, promove mai iha Tribunal ho krime haat, Burla Informatika, Asosiasaun Kriminoza, Brankamentus Kapitais no Jogu Ilisitu.
Oras nee dadaun arguidu sira, submete hela ba prosesu indentifikasaun neebe halao husi Juiz prosesu Jose Gonsalves.
Tuir regra neebe iha, prosesu primeiru interogatoriu nee sei rona uluk deklarasaun husi arguidu sira, remata tama ba iha faze alegasaun, no husi parte alegasaun termina maka foin tama ba iha despaisu Tribunal nian.
Tuir observasaun STL nian, arguidu sira lori mai iha Tribunal akompana husi Polisia Diresaun Servisu Investigasaun Kriminal, utiliza ropa detidu. No oras nee dadaun, Tribunal sei suspende no sei kontinua fali halo indentifikasaun iha oras tuku 14:00 loraik.
Prosesu primeiru interogatoriu nee, prezide husi Juiz Turnu Jose Gonsalves, Ministeriu Publiku (MP) reprezenta husi Prokurador Domingos Gouveia Leite, arguidu sira hetan asistensia legal husi Advogadu Privadu nain rua.
Rekorda katak, antes nee operasaun Konjunta entre Komandu Polisia Nasional Timor Leste (PNTL) liu husi Diresaun Servisu Investigasaun Kriminal Nasional (DSIK), no Servisu Migrasaun (SM) neebe halo iha loron 08 fulan Julhu tinan 2026, hodi halo demantelamentu ba fatin Jogu Online no Scamming Call Centre hodi detein sidadaun estrangeiru hamutuk nain 29.
“Iha loron 08 fulan Julhu tinan 2026 iha oras 11:30, ami hetan kontaktu husi Servisu Migrasaun katak sira detekta uma ida iha parte aldeia Lenkari, Manleuana, Dom Aleixo neebe suspeita ba iha aktividade illegal nian, nunee DSIK ba iha fatin neeba, halo intervensaun no deteta katak sidadaun Xinezes hamutuk 28 no sidadaun Cambodia ida, neebe halo hela sira nia aktividade Scaming nian neebe identifika mos Online Game iha fatin neeba, “esplika Porta Voz Komandu PNTL, Superintendente Xefe Polísia João Belo dos Reis, liu husi Konferensia Imprensa.
Nia hatutan, Polisia halo buska ba sira nia fatin, kaptura sira no lori sira mai iha DSIK. Evidensia sira neebe hetan iha fatin neeba maka telefone hamutuk unidade 60, Tablet Samsung hamutuk unidade 2, Router hamutuk unidade 3, Komputador Portatil (Laptop) hamutuk unidade 32 no Osan cash hamutuk Dolar Amerikanu US$ 5632 no sira nia pasaporte mos asegura hamutuk 29 kompletu.
(ter)
