DILI, STLTIMORLESTE.com – Tribunal Judisial Primeira Instansia Dili (TJPID) iha loron Sabadu loraik nee (11/07/2026) halao prosesu primeiru interogatoriu ba kazu jogu online Scamming Call Centre, neebe foin lalais Polisia detein iha Metiaut.
Iha prosesu nee, arguidu hamutuk nain 28 mak submete mai iha Tribunal.
Arguidu sira lori mai iha Tribunal, hatais ropa detidu tama iha sala julgamentu numeru 3, hodi hahu halo indentifikasaun ba arguidu sira husi Juiz Jose Maria.
Tuir regra neebe, Juiz turnu sei halo indentifikasaun ba arguidu sira rona sira nia deklarasaun, depois tama ba iha faze alegasaun maka foin tama ba iha despaisu Tribunal nian.
Tuir observasaun STL nian, arguidu sira lori mai iha Tribunal hatais ropa detidu, no arguidu sira neebe iha laos mane deit, maibe iha mos feto. Arguidu sira akompana husi Polisia Servisu Investigasaun Kriminal.
No oras nee dadaun, faze indentifikasaun ba arguidu sira lao hela.
Prosesu primeiru interogatoriu nee, prezide husi Juiz Jose Maria, Ministeriu Publiku (MP) reprezenta husi Prokurador Rafael Gusmao, arguidu sira hetan asistensia legal husi Advogadu Privadu nain tolu.
Rekorda katak, oras nee dadaun Tribunal halao hela prosesu interogatoriu ba iha kazu Jogu online rua, hanesan Manleuana no Metiaut.
(ter)
