DÍLI, STLTIMORLESTE.com — Ekipa voleibol mane Joli-Tomi hetan vitória importante ho rezultadu set 3–0 kontra Matebian, iha kontinuidade Liga Voleibol Timor-Leste 1.ª Divizaun, époka 7.ª, 2026, ne’ebé hala’o iha Ginásio Desportu Díli, Kinta-feira, 29/10/2026.
Iha jogu ne’e, ekipa rua hatudu kompetisaun ne’ebé maka’as liuhusi servisu, passing, blok no smash, hodi buka pontu no hatudu kapasidade téknika ba apoiantes no simpatizantes sira.
Iha set dahuluk, Joli-Tomi domina jogu no konsege manan Matebian ho rezultadu 25–15. Maski Matebian koko halo rezisténsia, Joli-Tomi kontinua kontrola jogu to’o remata set.
Iha set daruak, Matebian aumenta presaun no koko halo reasaun, maibé Joli-Tomi kontinua hatudu konsentrasaun no koordenasaun di’ak, hodi manan tan ho rezultadu 25–19.
Set datoluk sai kompetisaun ne’ebé maka’as entre ekipa rua. Matebian no Joli-Tomi troka pontu ba malu, maibé Joli-Tomi kontinua hatudu konsisténsia to’o manan set ho rezultadu 25–16.
Ho rezultadu ne’e, Joli-Tomi manan Matebian ho set 3–0, ho pontu kompletu 25–15, 25–19 no 25–16.
Durante tempu deskansu, treinadór husi ekipa rua fó orientasaun no estratéjia téknika ba sira-nia jogadór, bazeia ba observasaun no avaliasaun ba jogu iha set anterior.
Iha parte seluk, apoiantes no simpatizantes husi ekipa rua kontinua fó motivasaun no apoiu ba jogadór sira liuhusi hakilar no basa liman, liuliu bainhira ekipa sira aumenta pontu durante kompetisaun.
(leo)
