DILI, STLTIMORLESTE.com – Diretór Ezekutivu Servisu Migrasaun, Komisáriu Asistente Polísia, Jorge Monteiro klarifika prezensa sidadaun Indonezia nain tolu (3) ho Jet privadu ida neebe altera iha Aeroportu Internasionál Prezidente Nicolau Lobato, Komoro, kinta (02/7/2026).
Nia dehan, sidadaun Indonézia nain 3 nee ho inisiál S, L no RS, sidadaun sira nee mai husi Indonezia altera iha territóriu nasional Timor Leste iha loron Segunda (29/6/2026).
“Ita nia papel nee atu garante katak, ema sidadaun internasional ou sidadaun Timor-Leste neebe sai husi territoriu nasional Timor-Leste nee priense rekezitus no mos tuir prosedimentu neebe legal, hodi bele sai iha liur no tama fila -fali, ida nee mak papel PNTL ninian, ida nee mak papel Servisu Migrasaun ninian,” hatete Diretór Ezekutivu Servisu Migrasaun, Komisáriu Asistente Polísia, Jorge Monteiro ba jornalista sira iha salaun MI, Sesta (03/07/2026).
Nia subliña, relasiona ho prezensa Jet privadu atu tula ema ruma nee, papel Servisu Migrasaun nia portofoliu nee mak atu garante ema neebe tama iha territóriu nasional Timor Leste hodi haree ema nee nia tama ho kriteriu neebe ke asegura ona iha lei no regulamentu sira.
Nia dehan, relasiona aviaun ho buat seluk-seluk nee laos papel Servisu Migrasaun nian. Komisáriu Asistente Polísia Jorge Monteiro deklara, nia la hatene ema nain tolu husi Indonézia nee mai Timor Leste, maibe sidadaun sira nee mai TL nee tama mai ho legal.
“Hau atu hateten katak, ema nain tolu mai iha ita nia rai nee, sira nia atividade nee atu halo saida-saida, nee laos papel servisu imigrasaun nian. Buat neebe mak hau hakarak hateten nee katak, ema nain tolu neebe tama mai iha territoriu nasional nee sira tama ho legalmente, tanba sira priense dokumentu no rekezitus sira neebe neseita antes tama iha territóriu nasional Timor Leste,” nia esplika.
Nia hatutan, konaba atu kontrola sidadaun nain tolu nee nia atividade durante estadia iha Timor Leste nee instituisaun seluk, nee instituisaun seluk nia kompetensia atu kontrola, laos migrasaun.
“Sira nia atividade nee laos ona Servisu Migrasaun nia kompetensia, ita nia kompetensia nee atu define katak sira nia entrada mai iha territóriu nasional nee tuir lei no regulamentu neebe iha ka lae? sira-nia dokumentu neebe neseita sira nee sira kompleta ka lae,” nia deklara.
Hatan konaba tanba sa mak Servisu Migrasaun autoriza ema sira nee ba fali sira nia nasaun orijen Indonézia, Jorge Monteiro hateten, fila fali katak papel Servisu Migrasaun ou portofoliu servisu Migrasaun nee haree ba iha entrada no saida sidadaun tama no husi territóriu nasional, tanba nee relasiona ho aviaun komersial atu tama ema Aviaun privadu atu tama hodi tula ema nee la kabe ba iha potensia Servisu Migrasaun ninian.
Monteiro hateten, konaba sidadaun Indonezia nain tolu nia dokumentu nee tuir prosesu legál.
“Relasiona ho sira nia dokumentu, hau atu hateten katak sira-nia entrada iha 29 Junhu 2026 mai iha territóriu nasionál, hau hakarak hateten katak sira nia entrada nee tuir lei no regulamentu neebe iha nee legal. Tanba sira priense dokumentu neebe iha ho nia prosedimentu, sira priense nuudar sidadaun estranjeiru neebe entrada tama iha territóriu nasionál Timor Leste,” nia deklara.
Nia akresenta katak, sidadaun estranjeiru nain tolu nee sai husi territóriu nasional nee tuir prosesu legal.
“Hau hakarak hateten katak sira nia saida husi territóriu nasionál Timor Leste legal, tanba sira priense no prosesu prosedimentu neebe iha hodi sai husi ita-nia territóriu nasionál Timor Leste”, katak nia.
Nia esplika, atu aviaun komersial mak mai tula ka aviaun Jet mak mai tula ka nee la kabe ba iha Servisu Migrasaun nian.
“Servisu Migrasaun nian kompetensia mak ema nee tama legalmente sai legalmente, mak ida ne’e deit”, nia tenik.
Komisariu Asistente Polísia nee hatutan, nuudar kualidade hanesan Diretór Ezekutivu Servisu Migrasaun la hatene ema nee mai, nia objetivu mai Timor Leste.
“Hau atu hateten katak ita nia lei aziliu migrasaun nee define kompetensia sira neebe kabe ba iha servisu migrasaun. Servisu Migrasaun ninian nee mak haree ba iha aspeitu konaba sidadaun ruma husi nasaun seluk ruma neebe tama iha territóriu nasionál Timor Leste tama ho legalmente mai ita nia rai ou lae! Ida nee mak papel Servisu Migrasaun nian”, nia koalia.
Nia haktuir ema nain tolu mai iha Segunda 29 Junhu 2026 foin lalais, maibe husi Servisu Migrasaun la hatene katak Jet privadu mak tula tanba nee husi parte seluk nia kompetensia atu haree ba ida nee.
Informa katak, sidadaun Indonézia nain tolu nee mai iha segunda (29/6) foin lalais no durante loron tolu iha Dili. No iha loron kuarta (01/7) foin lalais nee aviaun Jet privadu ida ho tipu Cessna Citation 700 Longitude (C700) semo husi Aeroportu Sukarno Hatta Banten mai Aeroportu Internasional Prezidente Nicolau Lobato Dili atu lori fila sidadaun Indonézia nain tolu nee ba fali sira nia nasaun orijen.
Entertatu aviaun Jet privadu nee altera iha Aeroportu Internasionál Prezidente Nicolau Lobato Dili iha loron kuarta (01/7) iha tuku 17:000 loraik foin lalais atu tula fila sidadaun nain hotu nee.
Hafoin aviaun Jet nee altera la konsege tula tanba komunidade intelensia autoridade seguransa inklui Servisu Migrasaun no parte Aeroportu la autoriza jeet privadu nee tula sidadaun Indonezia nain tolu nee tanba autoridade sira deteta katak aviaun referida nia dokumentu balun problema. Nunee aviaun Jet privadu de husi pasta deit iha postu Aeroportu Internasional Prezidente Nicolau Lobato Dili Komoru hodi submete ba prosesu investigasaun.
Informasaun neebe STL asesu katak, sidadaun estranjeiru nain tolu iha loron kinta (02/7) horseik tuku 9:00 dader sae aviaun Aero Dili hodi kontinua halo sira nia viajen ba nasaun orijen Indonézia. Tanba hetan aurorizaun husi Servisu Migrasaun tanba haree ba dokumentu katak sira la viola buat ruma.depois aviaun Jet privadu ida ho tipu Cessna Citation 700 Longitude (C700) iha loron kinta (02/7) horseik por volta tuku 16:00 loraik avaiun referida semo fali ba iha Indonezia.
Ekuantu durante estadia iha iha Timor-Leste, tuir informasaun neebe STL asesu katak, atu halo investimentu iha Timor-Leste tanba mai observa fatin estratejiku atu halo investimentu, sidadaun estranjeiru sira nee nuudar investor.
(jen)
