Joven Barak Ba Buka Servisu Iha Rai Liur

Trabalhador Timoroan halo juramentu ba servisu iha Australia no Koreia. (Foto: Espesial)

DILI, STLTIMORLESTE.com – Governu falha iha planu politika nasional, la kria kampu servisu iha rai laran, halo joven barak husik hela familia hodi buka moris iha rai liur.

Kestaun nee hatoo husi Diretor Luta Hamutuk, Jose Alves Da Costa ba STL liu husi telefone, Segunda (20/01/2025).

Nia hatete, joven barak neebe mak kada loron sai ba rai liur hodi husik familia liu-liu feen, oan no familia, falha husi Governu, tanba la kria kampu servisu. Joven neebe mak kada loron sai ba rai liur hodi buka servisu nee tanba nesesidade, tanba haree sira neebe lao idade prodututivu mak barak liu 30% kompara ho labarik no ferik katuas.

“Nee idade neebe mak produtivu tebes hodi bele kontribui ba dezenvolvimentu rai ida nee nia, maibe ita nia politika nasional nee la sertu, ita la halo investimentu ruma iha nee atu hasae produtividade, hasae kresimentu trabalhu, ema nasaun seluk mak utiliza fali hodi hasae produsaun neebe iha Timor la uza, tanba nee mak ita nia joven kuaze loron-loron ba Aeroportu, maske ho loron neebe todan tebes husik sira nia familia inan aman no oan sira hodi buka moris iha rai seluk, ida nee falha husi planu politika Nasional, ita nein atu halo ahikosen ida mos labele halo, baut oan ida mos labele halo,” dehan Diretor Luta Hamutuk nee.

Diretor Luta Hamutuk nee hatutan, maske Timor Leste ukun liu ona tinan 20, maibe seidauk halo produsaun ba ahi-kosen no baut oan deit mos seidauk bele, maibe hakarak halo alargamentu estrada, la kria uluk kampu servisu ba joven, halo joven sira halai hotu ba rai liur, fiar katak aban bainrua joven sira nee sai bainaka ba nia rai rasik.

Investimentu iha rai laran laiha, forsa trabalhu iha rai laran laiha, ema husi nasaun seluk mak mai buka US$ 1 no US$ 2 iha nee, no sira rasik mak aban bainrua sai kapital boot iha pais ida nee no rai nain sai fali bainaka ba nia rai rasik.

Nunee mos Diretor Ajar, José Luis de Oliveira afirma, Ministra no Ministru barak laiha vizaun no planu politika diak, oinsa mak kria kampu servisu, tanba nee joven sai hotu rai liur.

“Ita nia Ministru no Ministra sira nee laiha kapasidade politika neebe diak, vizaun Politiku mos laiha, haree deit agora Ministra Saude iha Hospital ema ida mate barak no fasilidade laiha ba fali halo Fashion Show, ida nee Sekretariu Estadu Arte no kultura mak fortofoliu laos fali MS,” dehan nia.

Entretantu Visi Diretor Hak, Antonino de Limas hatutan, hahu kedas ukun aan tesik mai koalia ona oinsa dezenvolve setor agrikultura, ho politika neebe lo-loos depois implementa, maibe too agora laiha implementasaun.

Uluk too agora deit orsamentu ba setor agrikultura la too 3%, ida nee signifika Politiku nain sira koalia katak tau prioridade ba agrikultura, maibe koalia deit pratika laiha, nee refleta iha orsamentu Jeral, se persentajen kiik nee lo-loos apoiu setor agrikultor hira, tanba la too 3%, ida nee Inklui ona selu salariu ba funsionariu iha Ministeriu Agrikultura nee tau ba intrese agrikultura nee oituan deit.

(eme)

Share it :

Leave a Reply

Your email address will not be published. Required fields are marked *