DILI, STLTIMORLESTE.com – Joven barak sai hotu ba rai liur tanba Timor Leste (TL) laiha kampu servisu, se joven produtivu sai hotu futuru sei mosu impaktu ba krize lideransa.
Tuir Staf Peskizador Lao Hamutuk, Celestino Gusmão Pereira katak, joven neebe sai hotu ba rai liur hodi buka moris, tanba iha rai laran rasik laiha duni kampu servisu.
“Sira ba buka osan, ajuda sira nia moris, sira nia futuru, tanba iha Timor Leste too agora seidauk iha kondisaun atu oferese oportunidade ba maluk sira hodi iha rendimentu ga falta iha kondisaun atu organiza sira nian moris no futuru,” katak Celestino ba STL liu husi telefone, Sesta (14/02/2025).
Nia dehan, oras nee daudaun joven rihun ba rihun mak sai hotu rai liur futuru sei lakon rekursu umanu hodi dezenvolve TL.
“Ita labele nega katak, Timoroan rihun ba rihun sai husi nasaun, TL lakon oportunidade rekursu umanu atu dezenvolve Timor Leste nian ekonomia no futuru, maibe foinsae enerjiku sira ba dezenvolve rai seluk nian ekonomia,” katak nia.
Nunee mos Peskizador AJAR, Inocencio de Jesus Xavier hatete, oras nee Governu la iha politika ida atu loke kampu servisu halo joven sira sai hotu ba rai liur, futuru sei iha impaktu ba krize lideransa.
“Impaktu iha, impkatu ida mak sei iha krize lideransa, joven barak neebe hakarak sai ba liur iha rai ida nee sira laiha ona esperansa nee perigu ba ita nia estabilidade nasaun, ita nia joven sira hanoin eskola hotu ba liur, entaun sira hanoin ba eskola diak liu tuir kursu ingles, korea, nunee ba korea no Australia, ida nee sei fo ameasa ba futuru TL nia ba oin,” katak nia.
(eme)
