DILI, STLTIMORLESTE.com – Fulan Dezembru nuudar fulan ikus ba tinan 2024 nian, tanba nee joven sira presiza nafatin kria pas no dame iha rai laran ka nasaun ida nee.
Xefe Bankada CNRT, Duarte Nunes espera problema neebe mosu dala ruma sempre justifika katak, kampu servisu laiha, maibe iha meius neebe atu buka hanesan hatoo pedidu ruma ba governu, bele mos liu husi organizasaun sira, nunee bele hetan apoia ruma. La presiza hatudu liu husi baku malu ka halo aktus oin-oin ba krimi hodi hatudu ba governu katak baku malu tanba laiha servisu, tanba laiha hahan.
Tanba Governu nee povu mak harii liu husi desizaun ba referendum, tanba nee ukun aan mak buka dalan oinsa bele hetan apoia husi governu hodi halao servisu, tanba kampu servisu nee laos depende deit ba funsionariu ka servisu iha governu, maibe iha dalan barak neebe atu servisu.
“Haree ba Santu Padre Francisco mai iha Timor, ita maioria Katoliku, mai nee lori pas no dame ba ita, tanba nee agora tama ona ba fulan ikus tinan 2024 nian, presiza kria pas no dame hodi simu Kosok Oan Jesus Kristus neebe sei mai,” katak Xefe Bankada CNRT, Duarte ba STL iha Parlamentu Nasional (PN), Dili, Segunda (02/12/2024).
Nia dehan, kria pas no dame nee tuir doutrina Maromak nian. Konaba preokupasaun kampu servisu menus, nuudar Timoroan nafatin fiar ba governu ida nee sei lori kadoras mai Timor Leste, atu nunee bele akumula mos joven sira, bele ajuda katak problema tan laiha kampu servisu,” tenik nia.
(gui)
