DILI, STLTIMORLESTE.com – Tribunal Judisial Primeira Instansia Dili (TJPID) iha loron Segunda nee (06/07/2026) halao julgamentu ba arguidu nain tolu (3) ho inisial AMM, JEE, no NJ, tanba komete krime hasoru lezadu inisial HAdFH iha Bairo Pite.
Iha indisus katak, iha loron 24 Janeiru 2025, maizumenus tuku 11:30 kalan, iha area Suku Bairo Pite.
Bainhira vitima too iha fatin refere, nia rona arguidu ida koalia, hodi mosu diskusaun.
Depois nee vitima no arguidu JEE tama iha diskusaun. Durante diskusaun nee, arguidu AMM baku vitima, atinji nia ibun. Tuir mai arguidu NJ kaer metin vitima nia kakorok, ikus mai arguidu JEE lori ai pedasuk ida no baku vitima iha ulun halo vitima sente moras no hetan kanek kmaan, hanesan hatudu iha atestadu mediku neebe iha autus.
Arguidu sira bainhira halo asaun hirak nee, hatene katak asaun sira refere hasoru lei. Sira halo ho hakarak rasik, ho intensaun no ho konsiensia tomak, la hakarak para husik halo asaun hirak nee. Sira hakarak estraga vitima nia integridade fizika no saude hodi halo nia sofre moras no kanek, no ida nee akontese duni.
Tanba nee, sira mos hatene katak hahalok hirak nee bandu no kastigu tuir lei penal. Tanba nee, konstitui nuudar koautor material no iha forma konsumada, komete krime ofensa ba integridade fizika simples, previstu no punidu tuir artigu 30 no artigu 145 husi Kodigu Penal.
Hatan ba akuzasaun sira nee, arguidu nain tolu konfesa katak sira halo duni asaun nee, maibe sira halo asaun nee ba lezadu atu momentu neeba lezadu labele kria tan problema foun.
Aleinde nee lezadu mos konfesa katak, arguidu sira pratika duni krime hasoru lezadu.
Rona tiha arguidu no lezadu, iha alegasaun MP husu Tribunal tetu atu aplika pena adekuadu ba arguidu. Enkuantu husi parte defeza husu Tribunal atu aplika pena multa.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz estajiadu nain ida, Ministeriu Publiku reprezenta husi Prokurador Aderito Tilman, arguidu hetan asistensia legal husi defensor Publiku, Deomentino Morais.
(ter)
