DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu nain rua (2) ho inisial HMdC no EPB, ba kazu tentativa omisidiu neebe akontese iha Kaikoli.
Iha indisus sufisiente katak, iha loron 2 fulan Fevereru tinan 2019, madrugada, lezadu CME han hamutuk ho nia kolega sira, tur hamutuk hela iha ponte oan ida.
Arguidu HMdC halai motor marka beat, halai motor ho velosidade makaas liu husi sira nia sorin, tanba nee testamunha Fransisco hase dehan halai nenieik.
Ho nunee arguidu fila fali motor mai hasoru sira, no testamunha Fransisco dehan ba arguidu katak, ami hase ita boot tanba halai motor makaas.
Arguidu fila fali motor no hateten ba sira dehan imi hein iha nee “hau ba bolu hau nia maluk sira mai, la kleur arguidu nain rua mai ho sira seluk kaer ho fatuk, hodi hateten ba lezadu ho nia kolega sira labele halai, maibe lezadu halai.
Arguidu HMdC kaer fatuk hodi tuda kona lezadu nia matan laran halo kanek, kontinua lori besi baku kona lezadu nia ulun, no arguidu EPB lori fatuk tuda kona lezadu nia ulun monu ba rai.
Lezadu hader hodi halai maibe arguidu HMdC duni tuir atu baku, maibe hasoru João Tavares hodi tuku João monu ba rai.
Bainhira komunidade sira rona hodi mai duni arguidu sira halai fila ba uma, maibe too iha arguidu sira nia fatin arguidu sira tama ba foti samurai no besi mai hasoru komunidade sira.
Arguidu nain rua ho arguidu sira seluk neebe la identifikadu kaer fatuk hodi tuda kona lezadu nia matan laran, no lori besi baku iha lezadu nia ulun, halo kanek no ba halo tratamentu iha HNGV.
Tanba nee, akuza arguidu sira hanesan ko autor material ba krime tentativa omisidiu neebe previstu iha artigu 138, konjuga ho lei Arma Branka numeru 5/2017.
Hatan ba akuzasaun nee, arguidu HMdC deklara katak, kona-ba faktus iha akuzasaun dehan sira lori samurai no besi kanu nee lalos.
Arguidu rekonhese, los duni momentu neeba arguidu konduz motor ida halai liu husi lezadu sira nia oin, no lezadu sira hase arguidu, ho ida nee mak arguidu mos fila mai hodi husu lezadu sira, no lezadu sira hamutuk baku arguidu.
Arguidu deklara, samurai nee laos arguidu sira nian, maibe lezadu sira nian, tanba arguidu sira tur hela iha uma laran lezadu sira ba no arguidu sira tauk halai sai, ho ida nee mak lezadu sira soe tiha samurai tama ba iha uma laran.
Aleinde nee, lezadu CME deklara katak, momentu neeba lezadu ho nia kolega sira tur hela, arguidu mai ho motor ida halai makaas, no sasin ida naran Sikito hase nia dehan halai neineik.
Ofendidu deklara, depois ofendidu hamriik ba hodi hase arguidu dehan halai neineik, rona ofendidu hase arguidu koalia barak. Ho ida nee sasin ida la aseita lori liman basa ba iha arguidu nia helem.
Depois ida nee, arguidu hasai liafuan ba lezadu sira katak, imi hein iha nee, depois arguidu mai fali lori ho nia kolega barak, no arguidu foti kedan fatuk tuda ba iha ofendidu kona iha nia matan hodi monu.
Ofendidu deklara, fatuk neebe tuda husi arguidu ofendidu monu tiha, la oras ofendidu hader fali mai kontinua fatuk ida kona iha ofendidu nia ulun kotuk, halo ofendidu hader mai oin nakukun halai ses husi fatin akontesimentu.
Ofendidu rekonhese, suku iha matan pontu walu. Maibe ikus mai haree katak sira sei relasaun familia, tanba nee sira rezolve tuir familia, arguidu fo osan US$ 500 ba ofendidu.
Rona tiha deklarasaun husi arguidu no lezadu, Tribunal husu atu tama ba iha faze alegasaun.
Iha alegasaun Prokurador husu Tribunal atu aplika pena efetivu ba arguidu nain rua. Enkuantu husi parte defeza husu Tribunal atu halo alterasaun ba krime neebe iha.
Rona tiha alegasaun, Tribunal adia ba loron seluk hodi rona desizaun.
Prosesu nee prezide husi Juiz Koletivu, Jumiati Freitas, Jose Quintao, Jose Gonsalves, Ministeriu Publiku (MP) reprezenta husi Prokurador Rafael Gusmao, arguidu hetan asistensia legal husi Defensor Publiku Humberto Alves.
(ter)
