DILI, STLTIMORLESTE.com – Tribunal Judisial Primeira Instansia Dili (TJPID) iha loron Sesta (03/07/2026) halao julgamentu ba arguidu ho inisial LdS, tanba komete krime ameasa no arma branka hasoru LM, neebe akontese iha Aitarak Laran.
Indisiu sufisiente iha autus, iha loron 28 fulan Maiu tinan 2023, arguidu LdS haruka nia feen ba ho lezadu lori lezadu nia motorizada ba pinor iha Amaco ho valor US$ 300,00.
Iha loron 5 fulan Junhu tinan 2023, por volta 10h:30, fatin Komoro Dili, lezadu ba husu tuir arguidu konaba nia motor neebe arguidu haruka lezadu ho arguidu nia feen ba pinor iha Sra. Amaco iha Aitara-klaran.
Lezadu ho arguidu haksesuk malu konaba motorizada neebe lori ba pinor hodi baku malu, tanba nee arguidu foti katana mau beka iha Loja Xineza hodi tau iha lezadu nia kakorok, maibe la hetan kanek.
Konsekuensia husi arguidu nia asaun nee halo lezadu trauma, tanba arguidu kaer ho sasan kroat.
Arguidu hatene katak bainhira lori sasan kroat hodi ameasa ema bele halo ema tauk, maibe nia nafatin kaer katana.
Arguidu halo krime ho livre, deliberada, konsentemente no hatene katak hahalok nee proibidu no hetan pena tuir lei.
Arguidu hanesan autor material ba krime Ameasa previstu iha artigu 157 husi kodigu penal no krime Armas Brankas tuir Lei N.º 5/2017 Regime Juridiku Pratika arte marsiais, ritual, armas brankas, rama ambon.
Hatan ba faktus nee arguidu deklara katak, arguidu la haruka nia feen ho lezadu lori motor ba gadai, tanba momentu neeba arguidu halao hela servisu hanesan badaen.
Arguidu deklara, ikus mai lezadu nia motor la fo fila, tanba nee lezadu buka arguidu ba iha sira nia kos atu koalia. Iha fali loron tuir mai, arguidu ba sosa material halo uma nian iha loja, maibe lezadu haree arguidu hodi bolu no mosu kedan diskusaun, tanba nee mak arguidu hamriik hodi ameasa lezadu.
Arguidu deklara, kaer duni katana iha liman maibe katana nee arguidu sosa, laos ho intensaun atu taa lezadu.
Arguidu deklara, ikus mai mak arguidu foin hatene katak, arguidu nia feen lori arguidu nia naran haruka lezadu lori motor ba gadai. Tanba nee halo arguidu hirus hodi separa kedan ho nia parseiru.
Rona tiha arguidu, Tribunal husu atu tama ba iha alegasaun. Iha alegasaun Ministeriu Publiku husu Tribunal tetu deklarasaun neebe iha no husu justisa ba arguidu.
Enkuantu husi parte defeza haree katak, faktus neebe iha sei mosu duvidas, tanba nee husu Tribunal atu absolve arguidu.
Rona tiha alegasaun, Tribunal deside adia ba loron seluk hodi rona leitura akordaun.
Prosesu nee prezide husi Juiz Koletivu, Jose Escurial, Fransisca Cabral, Juiz estajiadu, Ministeriu Publiku reprezenta husi Prokurador Nelson, arguidu hetan asistensia legal husi Defensor Publiku Jose da Silva.
(ter)
