DILI, STLTIMORLESTE.com – Ministeriu Publiku (MP) liu husi alegasaun ba iha krime ofensa korporais simples, arma branka no omisidiu ho forma tentada, solisita ba iha Tribunal atu apresia deklarasaun arguidu AdSS no ASA nian hodi foti desizaun.
Iha alegasaun nee, Prokurador Bartolomeo de Araujo deklara katak, arguidu nain rua konfesa ba faktus katak, momentu neeba sira nian rua ho kondisaun lanu, halo duni krime hasoru lezadu JAC.
Prokurador deklara katak, bazeia ba deklarasaun arguidu nain rua nian, Prokurador husu Tribunal tetu apresia deklarasaun arguidu nain rua nian, hodi aplika pena ba iha arguidu.
Enkuantu husi parte defeza nian, Anzelmo Akara deklara katak, ba krime ofensa korporais simples husu Tribunal atu tetu, se arguidu ho lezadu sira diak malu ona bele dada fila fali krime ofensa korporais.
Kona-ba krime arma branka no omisidiu ho forma tentada, defeza husu Tribunal tetu deklarasaun arguidu nain rua, hodi aplika pena neebe justu ba arguidu.
Rona tiha alegasaun, Tribunal adia ba loron seluk hodi rona desizaun.
Iha indisus katak, iha loron 15 fulan Junhu tinan 2025, haleu oras tuku 19h00 OTL, lezadu iha hela nia servisu fatin iha Audian, Suku Santa Cruz Dili.
Derepente testemunha Livania de Fatima Sarmento neebe servisu mos iha loja besik lezadu servisu ba, tama ba bolu lezadu dehan, arguidu nain rua presija atu koalia ho ita, lezadu mos hakat sai hodi hasoru malu no sira konsege kaer liman.
Depois kaer liman arguidu ASA hatete ba lezadu katak, nusa mak o amante ho hau nia ferik oan, lezadu ho hamnasa hatan dehan hau mos iha feen no oan, tuir mai arguidu baku kedas lezadu ho tuku dala rua atinji iha hasan parte karuk halo nia monu kedas ba rai.
Kuando lezadu hamriik arguidu AdSS neebe kaer hela tara futu manu nia hodi sona direta dala ida, atinji iha lezadu nia kabun parte karuk, kanek no ran sai barak.
Tuir mai lezadu hetan socorro hodi hetan tratamento iha Hospital Nasional Guido Valadares Dili.
Konsekuenia husi arguidus sira nia hahalok nee, halo lezadu hetan moras iha hasan parte karuk, no kanek iha kabun parte karuk lezadu hetan tratamentu intensivo iha HNGV Dili.
Arguidu sira halo hahalok nee, ho konsiente livre, deliberada, hatene katak ho tuku no sona hodi tara futu manu nia ho makaas hasoru ema nia isin) bele hamoras no hakanek no hamate ema seluk nia isin nee hanesan meius neebe hodi viola lei.
Arguidus sira hatene katak, nia hahalok sira descreve iha faktu ida nee nudar hahalok krime neebe lei bandu maibe kontinua halo.
Nunee, konstitui arguidu ASA hanesan autoria material ho forma konsumada ba krime Ofensas Korporais Simples tuir artigu 145 Kodiku Penal, AdSS hanesan autoria material ho forma konsumada ba kríme Homicidio iha forma tentada no tuir artigu 23, 24 138 Kodiku Penal, no Lei 5/2017 Arma Branka.
Hatan ba akuzasaun nee arguidu ASA deklara katak, iha momentu neeba arguidu ba, tanba vitima book arguidu nia ferik oan tanba nee maka sira ba husu.
Arguidu deklara, momentu arguidu ba nee arguidu mos bolu tan arguidu AdSS no dehan ba arguidu katak, vitima book nia feen.
Arguidu deklara, antes sira nain rua ba sira nain rua konsumu kedan tua. Arguidu deklara tan, depois vitima sai mai, arguidu lori liman basa deit, no arguidu AdSS maka lori Tara Futu Manu sona.
Audensia julgamentu nee, prezide husi Juiz Kolektivu, Arjentino Nunes, Ivan Patrocinio, Zulmira Auxiladora, Ministeriu Publiku reprezenta husi Prokurador Bartolomeo de Araujo, arguidu nain rua hetan asistensia legal husi Defensor Publiku Anzelmo Akara.
(ter)
