DILI, STLTIMORLESTE.com – Tribunal Judisial Primera Instansia Dili liu husi desizaun ikus ba kazu osan lakon iha Universidade da Paz (UNPAZ), desidi absolve arguidu nain tolu (3), Jose Gama Dos Santos, Flinto Tai Boe, Manuel Leo Siga, husi krime Abuzu Konfiansa Agravadu neebe previstu iha artigu 257 husi Kodigu Penal.
Tuir defeza arguidu nain tolu nian, Advogadu Privadu Olivio Barros katak, ba prosesu ida nee desizaun Tribunal Primera Instansia sai ona, no absolve arguidu nain tolu husi krime neebe Ministeriu Publiku akuza ba.
“Iha prosesu ida nee Tribunal Judisial Primera Instansia Dili nia desizaun ikus ba arguidu nain tolu, Tribunal desidi absolve arguidu nain tolu husi akuzasaun neebe mak Ministeriu Publiku aprezenta mai Tribunal,” dehan Olivio ba jornalista sira iha Tribunal Dili, Kuarta (04/12/2024).
Nia hatutan, desizaun nee sai iha loron 25 fulan Outubru tinan nee, no iha desizaun nee hateten katak, arguidu nain tolu Tribunal la konsege haree sira iha responsabilidade kriminal ba iha krime neebe mak Ministeriu Publiku imputa ba arguidu nain tolu.
Iha alegasaun MP nian husu arguidu nain tolu atu devolve hikas osan tuir saida mak hakerek ona iha akuzasaun, tanba dehan iha arguidu nain tolu nia responsabilidade. Maibe Tribunal haree provas sira iha akuzasaun la natoon atu hatudu katak sira nee kulpadu duni iha aktu sira neebe konsidera krimi ka lae no la konsege provadu katak, sira bele hetan responsabilidade kriminal tuir akuzasaun neebe iha.
No alegasaun MP nian husu arguidu nain tolu atu devolve hikas osan tuir saida mak hakerek ona iha akuzasaun, tanba dehan iha arguidu nain tolu nia responsabilidade. Maibe Tribunal haree akuzasaun provas sira iha akuzasaun, la naton atu hatudu katak sira nee kulpadu duni iha aktu sira neebe konsidera krimi ka lae no la konsege provadu katak, sira bele hetan responsabilidade kriminal tuir akuzasaun neebe iha.
Nunee defeza husu Absolvisaun tanba, sira labele hetan kastigu no sira laos kulpadu iha sira nia servisu loron-loron hanesan saida mak MP akuza. No akuzasaun MP nee, lo-loos tuir defeza nia haree la iha baze atu hetan kondenasaun ikus.
Hafoin ikus mai Tribunal Primera Instansia mos haree liu husi prosesu lubuk ida julgamentu, rona sasin, provas dokumentu, hodi deskobre sira la kulpadu iha prosesu nee no ikus desidi absolve.
Entretantu tuir akuzasaun husi Ministeriu Publiku neebe antes nee, Juiz prosesu lee sai iha sala julgamentu laran katak, arguidu JGS nudar Dosente iha UNPAZ iha tinan 2014 nudar Koordenador ba klase Paralelu UNPAZ nian iha munisipiu Ermera, Ainaro, Suai, Aileu, Bobonaro, Same, Likisa ho Oekusi.
Arguidu FTB nuudar Dosente iha UNPAZ no iha tinan 2012 too 2014 nudar Koordenador ba klase Paralelu UNPAZ iha Kovalima.
Arguidu MLSS nuudar Dosente UNPAZ no iha tinan 2014 too tinan 2019 nuudar responsabel ba Finansa UNPAZ nian.
Hanesan Koordenaror klase paralelu, arguidu JGS toma responsabilidade ba propinas sira selu husi estudante klase paralelu Munisipiu Kovalima nian neebe mak selu liu iha BNCTL no arguidu FTB toma konta propinas klase paralelu Ermera nian.
Atu halo levantamentu propinas iha BNCTL klase paralelu Munisipiu Kovalima nian tenke hetan asinatura husi arguidu JGS nuudar Koordenador, arguidu MLSS nuudar responsavel finansa no Reitor Anterior Saudozu Lucas da Costa.
Atu halo levantamentu ba propinas sira iha BNCTL ba klase paralelu iha Munisipiu Ermera tenke hetan asinatura husi arguidu FTB nudar Kordenador, arguidu MLS nuudar responsabel Finansa no Saudozo Reitor Lucas da Costa.
Saldu ikus propinas ba estudante paralelu Munisipiu Ermera no Kovalima nian iha tinan 2017 neebe fo sai husi BNCTL hamutuk US$ 130, 236.
Husi fulan Janeiru tinan 2017 too fulan Agustu tinan 2019, arguidu JGS halo levantamentu ba osan ho kuantia US$ 60,000.00 no arguidu halo levantamentu ba osan sira nee no utiliza sein halo relatoriu ka justiikasaun ruma konaba responsabel Universidade nian.
Iha tinan 2018 arguidu FTB taka konta bankaria klasse paralelu UNPAZ munisipiu Ermera iha Banku BNCTL ho osan total US$ 7,067.60.
Osan neebe iha leten arguidu FTB foti utiliza sein halo relatoriu ka justifikasaun ruma ba responsabel masimu Universidade nian.
Levantamentu ba propinas sira arguidu JGS no FTB halo iha banku BNCTL hetan konesementu autorizasaun husi arguidu MLSS nudar responsabel finansa UNPAZ nian.
Konsekuensia husi arguidu nain tolu nia hahalok nee fo prejuizu ho montante US$ 67.067,60.
Tanba nee MP akuza arguidu nain tolu hanesan ko autor material ho forma konsumadu ba iha krime Abuzu Konfiansa ida previstu iha artigu 257 husi KP.
Prosesu nee, prezide husi Juiz Koletivu, Jumiati Feitas, Jose Gonsalves, Joao Ribeiro, Ministeriu Publiku reprezenta husi Prokurador Aderito Tilman, arguidu hetan asistensia legal husi Advogadu Privadu Olivio Barros.
(ter)
