DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ba prosesu primeiru introgatoriu, deside aplika medida Prizaun Preventiva ba arguidu nain ida ho inisial D.
Iha despaisu Tribunal nian, Juiza turnu Ersilia de Jesus deside aplika medida Prizaun Preventiva ba arguidu ho inisial D hanesan manejer.
No arguidu nain 60 Tribunal deside aplika medida kausaun kada arguidu ida ho osan US$ 2500, no medida Aprezentasaun Periodika atu arguidu sira aprezenta aan iha Eskuadra Polisia neebe hela besik ba semana ida dala ida.
Tribunal mos fo prazu loron sanulu ba iha arguidu nain 60 atu selu kausaun neebe iha.
Hafoin despaisu tun, Tribunal mos esplika ba iha arguidu sira la konkorda ho despaisu Tribunal nian, bele liu husi sira nia defeza halo rekursu ba iha Tribunal Rekursu tuir prazu neebe iha durante loron 30.
Antes nee, iha alegasaun Prokurador Matias Soares husu Tribunal atu aplika medida Prizaun Preventiva ba arguidu ho inisial D neebe hanesan manejer.
Konaba arguidu nain 60, MP husu Tribunal atu aplika kausaun kada arguidu ho osan rihun US$ 2 no medida Aprezentasaun Periodika.
Enkuantu husi parte defeza arguidu sira nian husu Tribunal atu aplika kausaun US$ 10 ba arguidu inisial D neebe hanesan manejer no medida Aprezentasaun Periodika.
Enkuantu konaba arguidu nain 60, defeza husu Tribunal atu aplika medida Aprezentasaun Periodika hodi aprezenta aan kada fulan ida dala ida. No defeza mos husu Tribunal atu kausaun neebe MP husu rihun US$ 2, Tribunal bele deside menus husi nee.
Prosesu refere submete mai iha Tribunal ho numeru NUK :227/26.PNSIK.
Arguidu nain 61 nee husi parte Ministeriu Publiku (MP) liu husi Prokurador Matias Soares promove sira ho krime haat, Asosiasaun Kriminosa neebe previstu iha artigu 188 husi Kodigu Penal, krime Explorasaun Ilisitu Jogu neebe previstu iha artigu 322 husi Kodigu Penal, krime Brankamentus Kapitais neebe previstu iha artigu 313 husi Kodigu Penal, no krime Fraude Fiskal neebe previstu iha artigu 314 husi Kodigu Penal.
Arguidu sira ho inisial hanesan DRW, AV, HAA, GA, AW, MR, NU, SF, DAM, LH, RKL, AR, UHSD, WP, GS, AS, E, MIT, SDL, RH.
MI, SEBA, ARP, VR,FS, MS, MS, IM, AS, W, SR, MSFS, MAD, A, BF, MRS, ABS, R, JR, LTM.
FR,MR, R, AS, ACY, JRD, MRP, G, MRS, UR, SS, AM, KLT, S, R, RJ, K, AS,H no D.
Prosesu primeiru interogatoriu nee, prezide husi Juiza turnu Ersilia de Jesus, Ministeriu Publiku (MP) reprezenta husi Prokurador Matias Soares, arguidu sira hetan asistensia legal husi Advogadu Privadu nain rua.
Rekorda fali katak, iha loron Sesta (26/06/2026 dader tuku 8:00 Polisia Nasional Timor Leste liu husi Diresaun Servisu Investigasaun Kriminal deteta katak, iha area Tibar Bazartete Munisipiu Likisa iha sidadaun estranjeiru balun halao hela atividade scam call center hodi bosok ema.
Nune Polisia halo kedan apreensaun no buska no konsege detein suspeitu nain 61.
Iha apreensaun buska nee, Polisia preende objetu krime hanesan laptop, no telemovel neebe suspeitu sira uza hodi halo atividade ilisitu referida.
(ter)
