DILI, STLTIMORLESTE.com – Tribunal Judisial Primeira Instansia Dili liu husi desizaun ikus, kondena arguidu ho inisial DCS pena multa.
Iha loron Segunda nee (02/12/2024), Juiz Prosesu Ivan Suritay, desidi aplika pena multa US$ 90 ba arguidu, tanba konsidera provadu ba iha krime neebe Ministeriu Publiku (MP) akuza ba.
Iha sala julgamentu laran Juiz deklara, provadu hotu ba akuzasaun neebe MP produs, no provadu mos ba arguidu nia deklarasaun neebe fo iha Tribunal katak arguidu mak sosa tutan aikameli iha ema lori mai Dili hakoi iha tasi ibun, ho intensaun atu lori ba faan fali.
Tribunal tetu sirkunstansia hotu, haree arguidu konfesa ba iha faktus, arepende ba nia hahalok nee, tanba nee Tribunal desidi hodi aplika pena multa.
Tribunal mos deklara, kuandu arguidu la aseita ho desizaun nee, bele liu husi arguidu nia defeza atu bele halo rekursu.
Rona tiha desizaun nee, Advogadu Privadu Ismael Asunsao dehan, Tribunal aplika pena multa ba nia kliente.
“Tribunal aplika pena multa ba hau nia kliente, hau mos aseita ho desizaun nee,” dehan Ismael.
Nia hatutan, arguidu koopera diak ho Tribunal, no arguidu mos deklara ba Tribunal kona-ba aktu neebe nia halo, promete ona sei la halo tan iha futuru.
Audiensia julgamentu nee prezide husi Juiz Singular Ivan Suritai, Ministeriu Publiku reprezenta husi Prokurador Reinato Bere Nahac, no arguidu hetan asistensia legal husi Advogadu Privadu Isamael Asunsao.
(ter)
