DILI, STLTIMORLESTE.com – Kazu jogu online ilegal neebe deskonfia involve ka invade husi sidadaun Xina iha kapital Díli, agora daudaun komesa alarga no ataka tan too area munisipiu sira, tanba nee fo ameasa boot ba dezenvolvimentu mentalidade no futuru foinsae sira nian iha rai laran.
Akademista UNTL, Eduardo da Silva hateten katak, tekniku no internet nuudar meus dezenvolvimentu ida neebe diak, maibe monitorizasaun neebe fraku halo fali sidadaun sira monu ba dependensia jogu ilegal neebe lori impaktu negativu.
“Jogu online ilegal nee uluk deskonfia invade deit Díli, maibe agora iha foho mos ema hotu hotu kaer telemóvel hodi joga, kestaun nee laos deit estraga tempu produtivu, maibe mos bele fo impaktu ba mentalidade no mos ekonomia família nian,” dehan Eduardo ba STL, Tersa nee (15/07/2026).
Nia dehan, Polisia Nasional Timor Leste (PNTL) foin lalais nee konsege sobu tan rede jogu online ilegal ida neebe deskonfia opera hodi dada kliente sira iha area Munisipiu Likisa. Operasaun nee sai nuudar pasu ida hodi hatutan reasaun urjenre hasoru operador ilegal sira neebe komesa kria rede foun ba foho.
Nia husu Governu liu husi Ministeriu relevante no mos PNTL, tenke foti asaun lalais hodi kontrola ka blokeia asesu ba website, no aplikasaun ba jogu ilegal sira nee antes situasaun sira nee sai aat liu tan.
Iha parte ketak Observador Politika, Martinho de Araújo, sublina katak kazu nee labele haree deit husi parte kriminal, maibe mos presiza atensaun urjente husi família sira. Nia husu ba komunidade sira, liuliu iha area rural, atu matan moris no kontrolu uza labarik no foinsae sira hodi nunee lá monu ba rede krimi organizadu nee.
“Hau hanoin Governu nee presiza duni iha koordenasaun neebe forti no rigorozu entre parte seguransa no mos komunidade tomak, nunee bele prevee lalais ameasa krime organizadu neebe estraga fali foinsae sira nia futuru iha baze,” hatete Martinho.
Entretantu foin lalais nee, imajen no vidio neebe hatudu Polisia Nasional Timor Leste (PNTL) asegura sidadaun estranjeiru sira, liuliu Xina, neebe deskonfia involve iha rede jogu online ilegal iha Díli no Munisipiu Likisa, sai viral tebes no hetan reasaun oioin husi publiku no mídia sosial Facebook no TikTok.
(car)
