DILI, STLTIMORLESTE.com – Relasiona ho informasaun viral iha media sosial konaba kazu naok labarik, Polisia Nasionál Timor Leste (PNTL) konsidera informasaun ba kazu nee hoax.
Portavós PNTL, Superientendente Polisia João Belo Reis hatete, hanesan autoridade seguransa alerta nafatin ba inan aman sira atu akompanha no haree, maibe publikamente polisia hatoo katak too ohin loron seidauk iha keixa ofisiál ruma, mezmu polisia rasik alerta halo vizilansia no seguransa ba iha fatin-fatin, maibe seidauk iha keixa ruma tama iha skuadra Komando Polisia konaba ema naok labarik iha sira nia bairu.
“Neebe ita konsidera informasaun sira neebe mak mai ita verifika nafatin, polisia alerta nafatin patrulhamentu oras 24, atu asegura katak saida mak ema lansa informasaun sira nee dala barak ita halo konfirmasaun iha tereinu la los,” hatete portavós PNTL, Superientendente Polisia João Belo Reis ba jornalista sira iha Komando Jerál PNTL, Kuarta (08/07/2026).
Portavoz PNTL nee deklara, ba maluk hirak neebe durante nee halo propaganda hodi lansa informasaun naok labarik, PNTL konsidera informasaun iha balun los no balun Hoax. Tanba nee Polisia hanoin sei halo identifikasaun ba sira, posibilidade sei halo prosesu ba sira, tanba halo komunidade trauma no la hakmatek.
“Ita husu ona informasaun balun ba iha neeba, publikasaun maibe realidade seidauk iha keixa ruma kontra ida nee. Iha Baukau mak ita iha kazu riil ida, maibé bainhira polisia halo aprosimasaun ba familia, familia lakohi koopera ho polisia atu hatoo keixa,” katak nia.
Iha fatin ketak, Komunidade Suku Comoro, Maria Banca dos Santos deklara, iha Suku Comoro laran seidauk iha informasaun konaba labarik lakon, maibe iha Facebook iha katak, iha area Bebonuk Ema tenta naok labarik
“Ami iha Suku Comoro seidauk rona labarik lakon ou ema deskonhesidu naok labarik, maibe ita haree iha media sosial ema vois dehan ema tenta atu naok labarik mais la jadi, no balun ita haree video mane nain rua tenta naok labarik,” nia afirma.
(jen)
