BAUKAU, STLTIMORLESTE.com – Kazu omisidiu agravadu neebe akontese iha Aldeia Poros, Suku Mehara, Postu Administrativu Tutuala, Munisipiu Lautem, Tribunal Judisial Primeira Instansia Baukau aplika medida prizaun preventiva ba arguidu nain tolu (3).
Defensor Publiku José Delima aprezenta, kazu omisidiu agravadu nee akontese iha loron 10 Maiu nee iha festa koremetan mosu konfrontu entre grupu, rezulta vitima Vinsensiu de Jesus, idade 31 lakon vida no rezulta nain tolu kanek.
Hafoin kazu nee akontese parte Komando Polisia Munisipiu Lautem too kedas fatin akontesimentu identifika no suspeita ema nain 10 ba kazu refere, nunee iha loron 12-13 Maiu nee submete ba prosesu julgamentu primeiru interogatoriu iha Tribunal Judisial Primeira Instansia Baukau, iha neebe remata julgamentu Tribunal aplika medida prizaun preventiva ba arguidu nain 3.
“Remete mai Tribunal iha formasaun Ministeriu Publiku nian hetan suspeitu nain tolu neebe forte tebe-tebes involve direita iha asaun nee,” hateten Defensor Publiku José Delima ba jornalista sira iha resintu Tribunal Baukau hafoin remata julgamentu primeiru interogatoriu, Kuarta kalan (13/05/2026).
Husi arguidu nain 10, nain 2 Tribunal aplika Termu Identidade Rezidensia, nain 5 hetan medida koasaun aprezentasuan periodika, enkuantu nain 3 hanesan inisial LRH, GdSB no MdS Tribunal aplika medida prizaun preventiva, akuza ho krime 3 mak hanesan, omisidiu agravadu previstu iha kodigu prosesu penal artigu 139, ofensan integridade simples iha artigu 145 no danu simples iha artigu 258.
Entretantu prosesu julgamentu nee prezide husi Juíza Singular Maria Modesta Viera, reprezentante Ministeriu Publiku prokurador Osorio de Jesus no arguidu nain sira hetan defeza husi Defensor Publiku José Delima.
(tom)
