DILI, STLTIMORLESTE.com – Tribunal Judisial Primeira Instansia Dili liu husi leitura akordaun iha Sesta loraik (14/02/2025) kondena arguidu nain 6 ho inisial ZMC, VL, EMF, EMF, AF no JSJ ho pena prizaun tinan 3 suspende ba tinan 3.
Iha sala julgamentu laran, Juiz rosesu Afonso Carmona esplika, Tribunal konsidera faktus neebe konsta iha akuzasaun provadu hotu, katak arguidu sira komete duni krimi Auxiliu Imigrasaun Ilegal iha lei numeru 11/2017 no krimi kontrabandu iha artigu 316.
Tribunal koletivu tetu katak, iha mos atenuantes balu atu hakmaan arguidu sira, tanba arguidu sira konfesa imparsial ba faktus, foin primeira vez mai iha Tribunal. No kona-ba arguidu sira nia kolega neebe mate, arguidu sira fo apoiu too haloot matebian.
Haree ba sirkunstansia sira nee hotu, ikus mai Tribunal koletivu deside hodi aplika pena prizaun tinan 3, suspende tinan 3 ba arguidu nain 6.
Tribunal mos hanoin katak, ba oin arguidu sira labele pratika tan krimi refere, se pratika tribunal sei aplika fali desizaun ida oin. Kona-ba arguidu ZMC neebe antes nee iha hela Prizaun Preventiva, Tribunal mos hasai kedan despaisu mandadu libertasaun, hodi sai husi prizaun.
Tribunal mos husu arguidu sira la aseita ho desizaun nee, bele liu husi nia defeza hodi halo rekursu durante loron 30 nia laran.
(ter)
