DILI, STLTIMORLESTE.com – Prezidente Konselhu Imprensa (KI), Otelio Ote ho ekipa vizita ofisial ba media Suara Timor Lorosae (STL), hodi introdus progresu servisu nomos dezafiu neebe KI hasoru inklui mos buka hatene dezafiu saida mak media nee hasoru.
Iha biban nee, Prezidente Konselhu Imprensa, Otelio Ote liu husi nia aprezentasaun iha Knua STL Osindo, Tersa nee (04/02/2025) hatete, vizita ba media ho intensaun bainhira nia tama iha KI 2021, hakarak los atu halo vizita inisiu lori ekipa tomak foun atu halo vizita, maibe propoin iha plenaria sempre rezeita no dehan vizita nee ezekutivu sira nian, entaun adia beibeik.
“Too tinan kotuk luta koko fila fali, tanba atu remata ona mandatu tenke vizita media sira atu introdus ita nia progresu servisu no dezafiu, no ita mos tenke hatene saida mak sira enfrenta, laos vizita ofisial nee deit, maibe koko atu vizita informal sira kona-ba oinsa mak atu dezenvolve relasaun KI ho media parseiru sira, neebe vizita ida nee nuudar kontinuasaun, tanba tinan kotuk ami halo vizita ba media sira ho media sira iha munisipiu halo enkontru ho jornalista, no enkontru mos ho autoridade lokal, liu-liu Prezidente Autoridade no Komando Polisia atu introdus kona-ba liberdade imprensa, liberdade asesu informasaun oinsa hamutuk asegura atividade jornalista sira iha territoriu laran,” dehan nia.
Prezidente KI nee hatete, sesaun importante neebe mak atu koalia sai iha enkontru nee, primeiru mak atu instrodus kona-ba KI reafirma deit kona-ba progresu neebe atinzi no koalia mos oinsa progresu eleisaun ba membru KI foun, nomos saida mak presiza halo atu suporta ekipa plenariu foun neebe sei pose iha fulan Marsu nia laran.
Nunee mos CEO Media Suara Timor Lorosae STL, Salvador Januario Ximenes Soares hatoo agradese ba Prezidente Konselhu Imprensa ho ekipa neebe mak bele mai vizita media STL.
“Agradese ba KI bele mai vizita media STL, hau iha Jakarta fo hatene ona katak atu mai vizita. Hau hakfodak oituan koalia terbuka deit, hau hatete hau nia alin Ote nia mandatu atu hotu ona mak mai vizita hau nee, mehi hetan hau ka halo nusa mak nee, maibe hau konsidera ba konvite, tanba nee hau hatete hela ba HRD katak hau sei iha Jakarta hela, tanba nee muda ba semana oin hau iha Dili mak mai vizita,” katak CEO STL.
CEO hatete, KI nee mai atu koalia liu kona-ba profesionalizmu jornalizmu nia nee importante, tanba nee mak ho laran hatoo agradese ba KI husi Prezidente Konselhu Imprensa ho ekipa bele mai vizita STL hodi koalia asuntu liga ho vida jornalizmu nian.
(eme)