DILI, STLTIMORLESTE.com – Iha semana rua liu ba Eskola ESTV-IT 28 de Novembro Becora-Díli, klarifika ona diploma falsu haat neebe antes nee detekta husi parte Ministeriu Edukasaun (ME) no husi eskola klarifika ona ba ME.
Haktuir Diretor Eskola ESTV-IT 28 de Novembro Becora-Díli, Tomas Pinto ba STL iha nia knaar fatin Becora, Segunda nee (22/06/2026),
Nia dehan, konaba diploma falsu haat neebe mak husi parte ME identifika no antes nee fo sai ona ba públiku, nee iha semana rua liu ba sira mai ona iha eskola, no husi eskola klarifika ona asuntu ida nee ba ME liu husi diresaun auditoriu ninia.
“Ami klarifika ona ba ME, ida nee 2003, 2005 no 2008 nian nee mak ema nain haat, maibe ami deklara katak ami haree iha lista manual no ami nian sistema laran naran ida nee la eziste, no ami halo klarifikaaun ba iha diresaun auditoriu nian katak, ida nee la eziste no sira mos mai iha nee, ami mos rai hela dadus ida nee, atu nunee aban bainrua buat ruma ami ba hatan, tanba tempu nee nomos iha momentu nee ba Diretor sira uluk sesante hirak nee agora sei moris hela, bele investiga sira iha nee ba,” nia akresenta.
Tomas hatutan, iha semana rua ba kotuk husi Diresaun Auditoriu ME Nasional mak mai iha sira nian eskola, konaba ninia prosesu ba kazu nee husu deit ba iha parte auditoriu mak hatene liu, tanba sira klarifika ona karta ba sira, tanba ema nain rua mak mai iha Eskola Tekvo 28 de Novembro, hodi nunee husu tuir kona-ba diploma falsu haat neebe mak antes nee husi ME identifika ona.
“Semana rua ba kotuk ema nain rua mak mai iha ami nian eskola, tanba diploma nee mos sira nee jilid hotu ona, depois sira mos tau karimbu hanesan edukasaun ninia nee, no buat seluk neebe laiha resiona ho diploma nian, ema halo iha liur ou lae, ami mos la hatene, tanba iha tempu nee ba ami sei eskola no seidauk hanorin estudantes iha eskola,” nia esplika.
Tuir nia, nuudar diretor eskola ba futuru sira sei kontinua kontrola estudantes sira nian dadus nee, tanba dadus nee tenke haree ba iha sistema laran, atu nunee ema mai buka tuir deit numeru iha diploma nee ida-idak nian iha, nee duni verifika tuir ida nee deit, tanba naran iha diploma nee la eziste iha sistema eskola nia laran,” nia dehan.
Hatan ba asuntu nee sub Inspetor Geral Nucleu Administrasaun Eskolar, Rodolfo Aparicio dehan, daudaun nee seidauk bele fo komentariu ba media, tanba ba asuntu nee ninia prosesu investigasaun sei lao hela.
(jac)
