DILI, STLTIMORLESTE.com – Ministeriu Ensinu Superior Siensia no Kultura (MESSK) rekonhese katak, klase paralelu neebe mak eziste iha munisipiu nee sira priense duni rekezitus husi ministeriu.
Lia hirak hatoo husi Diretor Jeral Ensino Superior no Siensia, Domingos Barros ba jornalista STL iha nia knaar fatin, Kuarta nee (12/08/2026).
“Hau hanoin konaba klase paralelu, sira neebe mak durante nee hetan lisensiamentu no priense rekezitus kontinua lao nafatin. Sira neebe mak laiha lisensiamentu nee husi Ministeriu sei la autoriza hodi halo ba graduasaun no legaliza diploma. DIT RAEOA ativu ho kursu neebe hetan lisensiamentu Inklui mos ISC iha Aileu no Baucau,” dehan nia.
Iha fatin seluk, Reitor DIT, Salustiano dos Reis Piedade dehan, oras nee daudaun Dili Institute Of Technology (DIT) halo hela estudu viabilidade, hodi loke kampus rejional iha Munisípiu Baucau, no sei halo proposta ba Ministériu Ensinu Superior Siensia no Kultura (MESSK).
“Agora daudaun nee ami halo estudu viabilidade ba iha Baucau, estudu nee sei lao hela, bainhira estudu remata ona nee depois mak ami halo analiza, tanba nee ami nian survei nee remata mak ami bele hatene, nee ami loke iha Baucau Kota Baru, iha neeba ami loke ona uma tolu,” nia dehan.
Nia hatutan, tanba uluk sira atu loke sentru treinamentu iha nee ba, maibe la konsege, depois sira koko atu halo ona survei hodi loke departamentu balun iha nee ba, tanba nee mak sira paradu tiha nee, tanba nee agora daudaun sira halo fali estudu viabilidade ba Ida nee.
“Ami iha planu sei loke tan kampus rejional Baucau, agora daudaun iha hela faze estudu viabilidade, liu husi estudu née mak ita hetan informasaun hodi loke departamentu saida iha nee ba. Maibe antes atu loke, bazeia ba rezultadu estudu née mak sei hatoo proposta ba MESSK para hetan lisensiamentu operasional. Kuandu iha ona lisensiamentu operasional mak foin bele loke,” nia esplika.
Iha fatin seluk, Reitor Instituto Superior Cristal (ISC), Sebastião Pereira dehan, ISC seidauk iha planu loke tan polo iha munisipiu seluk, tanba nee sei mantein polo tolu neebe daudaun nee eziste ona.
“Ami nian polo tolu iha munisipiu tolu nee agora daudaun sei nafatin, nee mak eskola polo husi Munisipiu Baucau, Manufahi no Aileu ba oin sei la loke ona iha munisipiu seluk, tanba ami sei mantein ho polo tolu neebe mak daudaun nee iha,” nia esplika.
Nia dehan, ninia prosesu ensinu aprendizajen iha eskola polo tolu nee lao diak hanesan baibain, tanba kada dosentes idak-idak halao ninia prosesu aprendizajen ba estudantes lao ho diak, nee duni polo tolu nee halo ninia atividades lao diak.
(jac)
