DILI, STLTIMORLESTE.com – Komandante Jeral Polisia Nasional Timor Leste (PNTL), Komisiariu Afonso do Santos fo ona kbiit ba Inspetor Jeral hodi halo verifikasaun no inspesaun no audit hodi buka hatene kazu hun no abut husi Superintendente Polísia Julia Gama nia problema.
Kestaun nee hatoo husi Segundu Komandante Komisaria Asistente Polisia, Natercia Martins ba jornalista bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta (17/04/2026) hatete, liga ho problema Superintendente Polísia Julia Gama nia dadaun nee Komisariu Jeral fo ona kbiit ba Inspektor Jeral hodi halo verifikasaun no inspesaun no audit hodi buka hatene kazu hun.
Segundu Komandante hatete, daudaun nee Komandante Jeral fo ona kbiit ka poder ba inspetor jeral neebe iha liu kompetensia atu bele verifika halo inspesaun halo audit para buka hatene lolos nia hun no abut iha neebe hodi lao tuir lei nee rasik.
“Hanesan hau hatete ona iha tempu hira liu ba kuandu koalia konaba problema neebe involve pesoal polisia se problema involve pesoal polisia iha buat rua deit ida problema displinar ida krime no komportamentu rua nee aktu husi rua nee ita iha regra ita mos iha lei no ita iha prosedimentu neebe fila fali ba instituisaun saida mak ita atu halo sekarik komete imfrasaun displinar tenke iha aktu nee rasik no tenke iha ema neebe sai vitima no tenke iha nia evedensia para sai prova nunee para komando hola desizaun mais prosesu nee lao mak rekejitu tolu nee la prense ida nee mos dezafia komando atu hola desizaun tuir ema nia hakarak,” dehan Komandante Natercia.
Segundu komandante hatete, durante polemika ida nee lao iha buat balun komandante Julia Gama reklama nia direitu mais nia reklama nia direitu nia tenke reklama ba semak atu bele fo solusaun ba nia direitu nee.
“Media nee buat ketak ida la fo solusaun media dala ruma kuandu ita utiliza ba buat ida pozetivu nia kontribui maibe kuandu negativu nia soke nia harahun nia kria konflitu tanba nee mak hanesan ofisias superior I ofisiais polisia tenke hatene diferensia oinsa ita publika sai no oinsa tenke aprezenta ba ita nia komando superior para buka solusaun maibe komando liu husi lideransa sua exelensia komandante Jeral fo ona kbiit ka poder ba iha ita nia inspetor jeral neebe iha liu kompetensia atu bele verifika halo inspeksaun halo audit para atu buka hatene lolos nia hun no abut iha neebe hodi lao tuir lei nee rasik,” katak nia.
Nunee mos Komando Jeral PNTL, Komisariu Afonso do Santos hatete, liga ho problema komandante Julia Gama nia nee problema Interna PNTL. “Nee internal PNTL ita boot sira labele too iha neeba,” katak Komjer.
Foin lalais Ministru Interior (MI), Francisco da Costa Guterres orienta ona Komandante Jeral no Segundu Komandante Jeral rezolve Superintendente Polísia Julia Gama nia problema.
(eme/EST 1)
