DILI, STLTIMORLESTE.com – Segundu Komandante Polisia Nasional Timor Leste (PNTL), Komisaria Asistente Polisia, Natercia Martins hatete, iha esplikasaun husi ema balun deklara katak osan nee copy deit, maibe osan nee rasik uza sosa ona sasan.
Kestaun nee hatoo husi Segundu Komandante Komisariu PNTL, Natercia Martins ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensil Nicolau Lobato, Bairo Pite, Sesta (17/04/2026).
Komandante Natercia hatete, maske iha esplikasaun katak osan nee copy, nunee labarik kiik sira hodi halimar maibe tuir prova iha loron hira ba kotuk osan kopia nee uza sosa ona sasan iha loja sira. Sosa ona iha Dili satan iha foho sir abele bosok inan aman neebe la koinese osan falsu no orijinal.
“Hau hanoin esplikasaun klean husi komandante investigasaun kriminal ba publiku hatene hotu ona ninia prosesu nee lao ona prosesu legal nee maibe dalaruma atu responde ita boot sira nia pergunta nee ninia rohan husi prosesu nee bele nulu tiha, tanba segredu husi ita nian ita koalia sai tiha ona ba media tanba hau laos juiz los ga lae. Maibe hau hakarak koalia entermus de seguransa, seguransa nee laos ida baku malu deit, seguransa nee mai husi aspeitu barak loos iha laran. Ida ita haree husi numeru aas ita nia populasaun ka ita nia komunidade sira neebe mak lahatene lee no hakerek, no laiha kapasidade atu halo diferensia entre osan falsu no osan neebe mak orijinal iha neeba nee iha buat rua ona, ida hau bele dehan sira bele utiliza difisiensia neebe mak ita iha hodi bosok ita nia komunidade,” dehan Segundu Komandante.
Segundu komandante hatete ninia evidensia ka nia faktus evidensia neebe prova mak haree komentariu justifikasaun husi komandante investigasaun kriminal dehan katak osan nee iha loron hirak antes nee sira uza sosa ona sasan signifika katak osan neebe sira dehan kopia ka osan halimar ka sira konsege sosa ona sasan no hetan ona osan orijinal nee ba iha sira nia bolsu nee ida nee akontese iha dili.
“Oinsa osan nee distribui ka bosok ema iha foho sira area rural no remotas sira uza ba sisa rai por ezemplu sira uza ba hafolin feto por ezemplu, tanba ita haree ita nia maluk feto barak mos vulneravel la halimar ho buat sira nee hotu, hau la koalia klaru liu iha nee ho buat sira nee husi segredu de justisa diak liu mak nee prosesu nee lao ba oin buat ida osan tebes ga la tebes buat ketak ida too iha tribunal deside dehan osan nee ba halimar ka osan nee para mai halo duni atividade ruma ka tribunal mak iha kompetensia, neebe hau la esplika klean hau so bele fo atensaun katak deit katak Timor oan hotu tenke matan moris neon nain Timor ita nia rai Timor presiza seguru buat balun neebe mak lori inseguransa nee ita buat sira nee mai nee gosta halo ita nia matan nee kan mais ita la domina ita ninia an ita la domina ita ninia espiritu atu hadomi rai ida nee ho povu nia nia seguransa dalabarak ita monu,” dehan Komandante Natercia.
Iha biban nee Komandante husu komunidade nafatin matan moris neon nain liga ho osan falsu ka osan copy nee.
Nia hatutan tan katak, komentariu iha media komandante lee akompana iha neeba dehan nee taka tiha komentariu nee sira rona hanesan ema matenek haree husi matenek ninian mais PNTL nia servisu nee oinsa atu salva asegura ema neebe mais vulneravel.
Ema hotu-hotu Timor Oan hotu-hotu nia responsabilidade, se joven sira koalia hanesan nee husu tok uluk joven sira hola parte iha rezistensia kontribui ba ukun rasik an nee ga lae hatene situasaun sira nee uza fali ida nee ba atu julga situasaun neebe mak mosu iha tempu ida agora.
(eme/EST 1)
