Komando Díli Asegura Autor Rama Ambon Nain 2 Ba Sela Detensaun

Ilustrasaun (Foto: Espesial)

DILI, STLTIMORLESTE.com – Komando Polisia Munisipiu Dili submete ona autor ba kazu rama ambon nain 2 ba sela detensaun, hodi kumpri 72 oras no kuntinua prosesu ba Ministeriu Publiku (MP).

Komandante Polisia Munisipiu Díli, Superintendente Xefe, Orlando Gomes hatete, autor nain 2 nee komete kazu rama ambon nee iha area Balibar Rankai, hodi hakanek vitima mane ida no daudaun nee halo hela tratamentu iha Hospital Nasional Guido Valadares (HNGV).

Nia esplika, iha akontesimentu nee ekipa patrolhu Eskuadra Kristu Rei, Forsa Rezerva no Araina too kedan fatin hodi halo kapturasaun ba autor nain 2 nee no lori kedan mai iha Eskuadra hodi submete ba sela detensaun.

“Daudaun nee autor kazu rama ambon nain 2 nee ita submete ona ba sela detensaun hodi kumpri 72 oras, nunee kuntinua prosesu ba Ministériu Publiku,” hatete Superintendente Xefe, Orlando Gomes ba jornalista sira, iha Komando PNTL Kaikoli, Dili, Kinta (16/1/2025).

Maibe nia dehan, rama ambon nee konsidera hanesa krimi arma branka lei numeru 5/2017, tanba nee se deit mak komete tenke prosesu tuir lei, nunee bele responde ba aktu krimi neebe nia komete.

Enkuantu suspeitu nain 2 nee ho inisial BP no LM, suspeitu seluk Polísia sei buka tuir nunee bele submete hotu ba prosesu.

“Komando Polísia Munisípiu Díli nafatin halo patrolhamentu, hodi halo prevensaun ba kualker krimi iha kapitál Díli,” nia deklara.

Iha fatin ketak, Veteranus Costantino Ximenes “Nehek Metan” esplika, nuudar joven jerasaun ba nasaun RDTL ida nee labele lakon tempu ba oho malu, baku malu, hana malu, maibe uza tempu nee ho didiak hodi aprende buat neebe halo mudansa ba moris.

“Funu ho inimigu hotu ona,.agora joven sira nia tempu mak eskola no aprende atu lori nasaun nee ba oin nafatin, labele loron kalan mak hanoin oho malu, hana malu, baku malu, ida nee valor laiha,” nia esplika.

(jen)

Share it :

Leave a Reply

Your email address will not be published. Required fields are marked *