DILI, STLTIMORLESTE.com – Komando FALINTIL-Forsa Defeza TImor Leste (F-FDTL) realiza seminariu Nasional ba membru F-FDTL sira, seminariu ida nee atividade ida neebe relasiona ho loron aniversariu FALINTIL transforma ba F-FDTL.
“Seminariu ohin fo hanoin mai ita katak, seguransa no defeza lo-loos katak, tenke hahu husi ita nia uma laran, tanba nee mak ohin ita iha nee atu diskuti no buka ideia inovativus sira hodi servisu hamutuk,” hatete Xefe Estadu Maior Jeneral F-FDTL, Tenente Jeneral Domingos Raul “Falur Rate Laek” liu husi nia diskurus iha ambitu seminariu iha Kuartel General Fatuhada, Dili, Sabadu (01/02/2025).
Nia dehan, seminariu ida nee konstitui oportunidade atu hasae komprensaun iha area libuk ida, nunee mos oportunidade uniku atu hasae komprensaun entre defeza no seguransa entre sosiedade sivil, atu nunee bele komprende diak liu tan oinsa dejenha politika publiku nia diak liu tan.
“Mai ita diskuti ita nia hanoin, no fahe ita nia esperiensia no komprensaun hodi identifika area sira aplikasaun forsa armadas nian. Hau hein katak seminariu ida nee sei hatan ba pergunta fundamental sira kona-ba oinsa parseira sira bele harii no dezenvolve no sustenta Forsa Armadas sira hodi hatan dezafiu segurasan neebe kompleksu, neebe forma ita nia ambiente estratejiku tuir misaun Forsa Armadas nian, neebe hakerek iha klKonstituisau, Lei Segurasan Nasional no Lei Defeza Nasional,” nia esplika.
Nia informa, kobera atu ativa asegura seguransa ba nasaun nia interese no proteza sobarania ba futuru.
“Ita bele harii nasaun ida neebe seguru no prosperu iha ita nia rejiaun liu husi komprensaun neebe fahe, kona-ba dezafiu sira, interese komun sira neebe harii intendementu neebe rezilente ba dame no prosperidade, forsa defeza hola parte iha prosesu ida nee,” nia koalia.
Xefe Estadu Maior Jeneral nee hakarak involvimentu Forsa Armadas, forsa segurasan no sosiedade sivil no grupu arte marsiais hodi tulun harii intendementu ba malu.
“Involvimentu liu husi atividade kolaborativa sira sei ajuda komprede, ita nia ambiente estratejiku hodi hatan ba dezafiu komun sira neebe hahu antes ona,” nia koalia.
Tanba nee hodi kria parserial segurasan nian neebe ativu no efetivu hodi estabelese relasaun sira.
“Ita kria seguransa neebe forte no oferese seguransa ba ita nia sidadaun sira, ho nunee aprofunda ita nia kompromisu pratiku,” nia hatutan.
Iha fatin hanesan, Presidente Komisaun Reguladora Arte Marsiais (KRAM), Octavio da Conceição sente orgulhu no haksolok tebes hodi mai hola parte iha loron selebrasaun transformasaun FALINTIL ba F-FDTL ba dala 24 liu husi atividade seminariu nasional ho tema tinan 2024 hafoin transformasaun FALINTIL ba F-FDTL neebe ho misaun ida prioridade hodi haree na realidade ba nasaun no dezafiu foun sira iha segurasan no nivel nasional no rejional.
“Hau nia naran no instutisaun neebe hau servisu ba hatoo ami nia parabéns ba F-FDTL neebe aban selebra loron aniversariu importante ida nee,” nia afirma.
(jen)