DILI, STLTIMORLESTE.com – Komando Polisia Nasional Timor Leste (PNTL) Munisipiu Dili sei bolu membru PNTL neebe asiste ka haree deit inan feto ida ho moras mental, neebe loron hirak liu ba sae riin eletrisidade no sirkui too mate fatin.
“Eletrisidade nee risku boot ida ba ita ema nia vida, hodi bainrua nee ita nia sidadaun feto ida moras mental sae ai-riin eletrisidade, too ikus eletrisidade soke too nia mate, tanba nee mak hau hakarak hatene polisia nee atu asegura no proteje kualker se deit, maibe polisia laos teknik EDTL, kuandu akontese hanesan nee polisia iha dever atu bele komunika ba iha EDTL, para hamate lalais ahi hodi salva ema nia vida,” hatete Komandante PNTL Munisípiu Dili, Superintendente Xefe Polisia, Orlando Gomes ba jornalista sira iha Eskuarda Dom Alexo, Aimutin, Díli, Tersa (11/02/2025).
Orlando rekonhese PNTL laos atu sai tekniku EDTL, maibe polisia iha dever atu kontaktu ba EDTL para bele hamate ahi iha momentu neeba, tanba nee Komando sei bolu membru PNTL sira neebe asiste iha fatin akontesimentu neeba, hein investiga sira.
Nia esplika, polisia hatene katak fatin nee risku, polisia tenke asegura no halo asaun ruma para bele salva, wainhira sidadaun nee iha leten ona, polisia labele halao buat ruma, tanba polisia laos tekniku EDTL, maibe polisia tenke halo meus seluk hodi kontaktu EDTL para hamate eletrisidade.
Orlando dehan, Komando sei bolu membru PNTL iha fatin akontesimentu, bolu para halo investigasaun hodi hatene ninia servisu iha terrenu.
“Ita bolu sira hodi invetiga, depois ita hatene sala nee iha neebe, kuandu ita hatene sala nee iha neebe, no ita sei foti medida disiplinar tuir erru neebe sira halo,” dehan nia.
Iha fatin ketak, Juanico Alves Tekniku EDTL informa, iha loron Domingu inan feto ida ho moras mental sae ai riin eletrisidade too lakon vida.
“Ita triste tebes haree situasaun sira nee, maibe EDTL labele halo buat ida, tanba ita la hatene ita nia inan feto nee sae ai riin eletrisidade, se ita hatene ita tenke hamate eletrisidade atu ita bele salva nia vida,” nia esplika.
Entretantu inan feton nee sae ai riin eletrisidade iha loron Domingu no too mate, depois mate isin lori ba Sala Mortuáriu Hospital Nasional Guido Valadares (HNGV), depois entrega ba familia matebian hodi halao nia serimonia fúnebre.
(jen)
