DÍLI, STLTIMORLESTE.com – Komandante Jerál Polísia Nasionál Timor-Leste (PNTL), Komisáriu Asistente Polísia Afonso dos Santos, garante katak prosesu teste ba kandidatu foun sei la envolve familiarizmu durante nia mandatu.
Nia afirma katak, kandidatu hotu tenke tuir regras no kritériu sira ne’ebé estabelese ona, la haree ba relasaun família ho membru PNTL.
Nia hateten sei la tolera membru PNTL ne’ebé protesta hasoru komisaun tanba sira-nia oan la konsege pasa teste.
“Hau repete dala ida tan, durante hau ho Segundo Komandante Jerál nia mandatu, teste sei lao tuir justisa, la iha familiarismu,” Afonso dos Santos deklara ba jornalista sira iha CCD, Kuarta-feira (14/10/2026).
Nia enfatiza katak, prosesu rekrutamentu tenke bazeia ba kompeténsia kandidatu ida-idak, atu dezenvolve PNTL ne’ebé profisionál.
“Ita-nia oan ne’ebé la pasa teste, labele haruka estudante seluk atu substitui. Ita hakarak dezenvolve PNTL profisionál, ne’ebé la iha familiarismu,” nia hateten.
Iha fatin hanesan, Segundo Komandante Jerál PNTL, Komisária Asistente Polísia Natércia Eufrásia Soares Martins afirma katak komandu sei kontinua mantein kuota 20% ba feto iha prosesu rekrutamentu ajente foun.
Nia hateten katak, kuota ne’e importante, maibé kandidata feto sira tenke iha preparasaun no kompeténsia atu kumpre knaar polísia.
“Ita labele aumenta de’it númeru feto, maibé sira tenke iha kapasidade atu hala’o servisu. Tanba ne’e, ita tenke prepara sira atu kumpre kuota ne’ebé eziste,” nia deklara.
Natercia afirma katak, rekrutamentu feto sei tuir kuota 20%, maibé seleksaun sei konsidera kandidata ida-idak nia rezultadu, liuliu iha ezame.
(jen)
