DILI, STLTIMORLESTE.com – Komisaun E neebe trata Assuntu Infraestrutura iha Parlamentu Nasional (PN) husu Governu atu buka lalais solusaun ba projetu konstrusaun Igreja Ai-mutin, neebe lao ona tinan 10 maibe seidauk finaliza.
Tuir Prezidente Komisaun E, Marcos Xavier katak, problema kona-ba konstrusaun Igreja Ai-mutin nee kleur tiha ona, tanba hahu iha VIII Governu tau ona orsamentu atu konstrui Igreja nee, maibe seidauk bele finaliza.
Tanba tuir informasaun neebe nia hetan, Governu aloka ona orsamentu tokon US$ 3 atu konstrui Igreja nee, maibe konstrusaun Igreja nee la hatene sei paradu hanesan nee, ho nunee nia husu Governu atu buka lalais solusaun ba projetu konstrusaun Igreja nee.
“Komisaun E hakarak rekomenda deit ba Governu liu-liu IX Governu Konstitusional atu haree mekanizmu oinsa para bele finaliza tiha Igreja nee, tanba konstrusaun Igreja Ai-mutin nee lao kleur loos,” hatete Deputadu Marcos Xavier ba jornalista sira iha resintu PN, Kinta (30/01/2025).
Nia hatutan, Governu apoiu orsamentu tokon US$ 3 no tokon US$ 1,5 apoiu husi populasaun atu kontrui Igreja Ai-mutin, maibe nu fim sarani sira la tau, maske tuir kalkasaun atu finaliza Igreja Ai-mutin nee presiza orsamentu tokon US$ 4,5.
Nia akresenta, projetu konstrusaun Igreja Ai-mutin nee mos durante nee la iha relatoriu, tanba nee nia sujere ba kompanhia neebe responsabiliza obra nee atu halo auditoria.
“Kompanhia neebe mak responsabiliza ba obra nee se bele halo auditoria ba konstrusaun nee hodi bele hatene osan nee Governu aloka ba nee utiliza ba saida deit, nunee ita bele hatene tanba saida mak Igreja konstrui seidauk hotu,” hatete Deputadu nee.
(alb)
