DILI, STLTIMORLESTE.com – Komisaun F iha Parlamentu Nasional neebe trata Asuntu Saude no Seguransa Sosial, ohin halo fiskalizasaun ba Institutu Nasional Farmasia Produtu Medikamentu (INFPM), hodi haree direita stok aimoruk iha armazem.
“Ohin ita mai halo fiskalizasaun iha armazem INFPM nian, ami haree katak iha mudansa boot neebe mak sira halo, liu-liu oinsa mak sira atu arma ai-moruk hodi haree tuir ninia fatin no lista sira neebe bele hatama ba iha sistema M-suplay no mos sitema kontrolu aimoruk sira, entaun ita haree katak iha mudansa neebe diak,” hatete Prezidente Komisaun F neebe trata Assuntu Saúde, Seguransa Sosial no Igualidade Jeneru iha Parlamentu Nasional (PN), Maria Gorumali Barreto ba jornalista sira iha Armazem INFPM, Campo Alor, Kinta (30/1/2025).
Nia dehan, aimoruk sira neebe ekipa sira tau tuir rak nee fasil ba sira atu kontrola ai-moruk nia stok sira neebe laiha, nunee mos tenke iha tekniku ruma iha armazem banhira iha orientasuan ruma atu foti aimoruk, entaun sira hatene ona atu foti iha rak sira neebe mak sira tau ba.
“Ita haree katak INFPM nia sistema nee kontroladu no mudansa ba iha asuntu nee, entaun iha buat hotu neebe mak ami haree katak la iha rekomendasaun makaas ba INFPM nia armazem no nia servisu, maibe hanesan Komisaun F PN presiza halo fiskalizasaun ba iha Diresaun Nasional Farmasia no Medikamentu (DNFM), neebe mak iha Ministeriu Saude nian atu haree sistema kontrolu nee oinsa, tanba esplikasaun neebe mak Diretor INFPM koalia katak, dala ruma stok aimoruk iha, maibe iha sistema autorizasaun neebe mak mai husi Diresaun Nasional Farmasia no Medikamentu mak dala ruma tarde, entaun afeita ba stok out neebe mak akontese, ho nunee mak ami presiza halo fiskalizasaun ba sira atu haree katak, ho razaun saida mak buat hotu lao tarde,” nia informa.
Iha fatin hanesan, Diretor Ezekutivu Institutu Nasionál Farmasia Produtu Medikamentu (INFPM), Brigido Simão Dias deklara, durante nee INFPM halo distribuisaun aimoruk ba fasilidade saude sira banhira sira submete pedidu mai, maibe INFPM iha ona armazem iha rejional tolu hanesan Baukau, Maliana no Ainaro, entaun pedidu sira neebe mak fasilidade saude hatoo mak aimoruk sira nee la iha armazem rejional, entaun INFPM sentral bele distribui.
“Tanba nee mak publiku sira tenke hatene kona-ba INFPM ho DNFPM, tanba durante stok aimoruk la iha, sira husi Diresaun Nasional Farmasia Produtu Mediku (DNFPM) mak kontrola iha fasilidade saude sira hanesan sentru saude too hospital sira, bainhira sira akumula hotu mak oin mai INFPM halo prosesu distribui, entaun ami nia autoridade nee husi armazem rejional,” nia afirma.
(jen)
