DILI, STLTIMORLESTE.com – Relasiona ho politika Governu liu husi Sekretariu Estadu Formasaun Profisional no Empregu (SEFOPE) kontinua fo rekrutamentu ba trabalhador Timoroan hodi ba servisu iha Australia, tanba nee emprezariu CANEX husi Australia rekruta trabalhador Timoroan atu ba servisu iha Australia.
Tuir Emprezariu CANEX, Mark Catoni husi nia diskursu hatete, emprezariu ka kompanhia neebe mai fo rekrutamentu ba trabalhador Timoroan sira, nee husi skema Pasific Australia Labour Mobility (PALM) mak mai halo rekrutamentu no intrevista ba trabalhador sira, liu-liu iha area hospitalidade nian hanesan servisu iha hotelaria, tein sira, atu husi pratika sira nee mak hanorin ba sira.
“Ita halo rekrutamentu ba trabalhador Timoroan nain 64 neebe kompostu husi feto nain 32 no mane nain 32, atu ba servisu iha Australia, liu-liu iha area hospitalidade nian, tanba nee ohin ita fo entrevista ba sira, katak oinsa sira bele hatoo sira nia konesimentu no planu efetivu sira, bainhira ba servisu iha Australia,” dehan Emprejariu husi CANEX, Mark Catoni liu husi nia diskursu iha salaun ETDA Dili, Segunda (20/01/2025).
Nia katak, kandidatu trabalhador Timoroan nain 64 husi parte hotelaria hamutuk nain 44, tein hamutuk nain 20, neebe kompostu husi feto nain 32, mane nain 32 iha eskema PALM, Work Ready Pool, neebe tuir ona teste entrevista ho lian Ingles, liu-liu oinsa bele halo pratika iha area hospitalidade bainhira ba servisu iha Australia.
Trabalhador Timoroan neebe hetan oportunidade nee, tuir planu kompanhia CANEX atu lori sira ba servisu iha Austrália, tanba nee husu ba trabalhador Timoroan sira prepara aan ho diak.
Emprezariu Cantoni dehan, kontente tebes ho kandidatu sira neebe mai entrevista tantu pratika iha hotel nian no tein, esperansa boot, tanba diferensia ho tinan kotuk ninian, nunee husi rekrutamentu nee bele funsiona liu tan konhesimentu sira iha area hospitalidade nia ho efetivu.
Iha sorin seluk, trabalhadora Timoroan iha area hospitalidade nian, Anita da Silva hatete, oportunidade neebe ohin husi kompanhia CANEX fo ba trabalhador Timoroan sira, ho objetivu ida atu aumenta konhesimentu sira iha area hospitalidade nian.
Tanba nee mak ohin kompanhia mai fo rekrutamentu no entrevista ba trabalhador Timoroan sira, liu-liu feto tantu mane, atu ba servisu iha Australia area hospitalidade nian durante durasaun neebe kompanhia fo ba sira, nunee espera katak konfiansa ida nee bele servisu ho diak, loron ida sei fila mai hodi kontribui fali ba Estadu Timor Leste.
Iha fatin hanesan, trabalhador Timoroan, area kujineiru nian, Juvensio Neto Soares afirma, agradese ba oportunidade ida nee, fiar katak esperiensia sira neebe durante aprende, hanesan area kujina (tein) nian, oinsa bele profisionaliza liu tan iha ema nia rain, liu-liu iha Australia. Oportunidade ida nee laos ba buka osan deit, maibe bele mos aumenta esperiensia sira, liu-liu kapasita liu tan oinsa bele tein neebe diak, asegura hotelaria sira ho seguru, nunee bele estrativu ba ema hotu hodi mai vizita, entaun oportunidade ida nee hanesan estudu ida bele buka osan nomos aprende nian.
(EST 1)