DILI, STLTIMORLESTE.com – Sidadaun sira neebe hela iha Postu Administrativu, liu-liu sira neebe dok husi sentru saude bainhira sira nia familia ruma moras, sira tenke hulan deit too mai iha postu saude, tanba ambulansia iha postu saude sira la sufisiente.
Sidadaun Aldinu Soares Gomes hatete, presiza aumenta ambulansia ba iha postu saude sira neebe iha Postu Administrativu, para bele halo atendimentu tula no transfere moras sira husi postu bá sentru saude ho lalais. Bainhira iha ambulansia ida deit, susar tebes bá moras sira atu hetan lalais tulun husi parte saude nian.
Nia dehan, hanesan iha Postu Administrativu Atsabe nian, bainhira iha moras sira husi suku neebe dok husi postu saude neebe presiza tulun no ajuda atu ho lalais, ambulansia labele too iha fatin tanba atende hela ema moras iha fatin seluk. Situasaun ida nee halo moras sira sei terus ho sira nia moras, tanba labele hetan atendimentu saude ho lalais, tanba ambulansia menus no ida deit.
“Iha Postu Atsabe distansia entre suku ida bá suku seluk dok malu. Nunee mos husi hela fatin mai iha Postu Saude. Bainhira moras ida iha Suku Parami presiza ambulansia bá tula, nia labele bá fali iha Suku Laubonu ona tanba distansia entre suku rua nee dok malu. Tanba nee, ambulansia ida deit labele halo kobre bá fatin hotu. Tanba Atsabe nee luan no populasaun neebe barak, maibe ekipamentus no rekursu husi parte saude nian seidauk sufisiente,” dehan nia bá STL iha Bidau, Sesta (03/07/2026).
Nia parte rekomenda bá governu atu aumenta tan ambulansia bá Postu Saude sira iha Postu Administrativu sira, tanba ambulansia neebe iha fatin neeba la sufisiente atu halo atendementu bá ema moras sira ho diak.
Iha sorin seluk Prezidente Autoridade Munisípiu Ermera, José Martinho dos Santos Soares hatete, numeru ambulansia neebe la sufisiente nomos kondisaun estrada iha Munisipiu Ermera nian neebe kondisaun la diak, maibe ho programa governu sira nian bele responde ho diak.
Nia afirma, kuaze ambulansia iha postu nee iha ida ida, maibe nee la sufisiente. Tanba Postu sira boot hanesan Atsabe, Hatulia nee dok husi sentru saude sira, sira presiza duni ambulansia.
“Iha orsamentu ba 2027 nee tau ona osan para sosa tan ambulansia ba postu sira. Minimu liu iha postu ida iha ambulansia rua hanesan nee para responde povu sira nia nesesidade,” dehan nia.
Nia hatutan, total orsamentu neebe propoin iha 2027 nee US$ 25 milloens ba Munisipiu Ermera nian, nee ba programa hotu-hotu. Ba programa administrasaun, programa planu desenvolvimentu integradu munisipal, programa PNDS no sira seluk tan.
(dom)
