DILI, STLTIMORLESTE.com – Padre Richardo Pasang, SVD hatete, komunidade neebe diak sempre halibur malu ho domin no unidade.
Padre Richardo Pasang, SVD hatoo lia hirak nee liu husi nia reflesaun Diaria Katolika, Kinta (06/02/2025) Semana IV do Tempu komum Memoria Santos Paulo Miki, presbitero E Companheiros, martires Heb. 12 : 18 – 19, 21 – 24 Marc. 6 : 7 – 13.
“Realidade hatudu mai ita katak, familia barak tempu agora hela dook malu tanba razaun oin-oin atu bele hametin liu tan unidade moris, familia tau planu hamutuk iha momentu ida neebe sertu hodi halibur hamutuk. Tanba nee, iha liafuan neebe dehan katak han ka la han, importante ita bele halibur hamutuk. Tendensia ho liafuan hirak nee atu hatudu importansia moris hamutuk nuudar familia ou moris komunidade. Komunidade ida neebe diak mak komunidade neebe halibur hamutuk ho hakarak diak,” katak Padre, Richardo.
Padre Richardo hatutan, tan nee Surat ba Hebreu sira husu hotu-hotu atu hasae agradese, tanba tama ona iha komunidade divino.
“Imi hakbesik ba foho santu Siaun, ba Maromak moris Nia sidade. Imi hakbesik ba Jeruzalem Lalehan. Imi hakbesik ba anju rihun ba rihun neebe halibur ba festa. Imi hakbesik ona ba oan mane boot’ sira neebe halibur hamutuk hela sira naran hekerek ona iha Lalehan. Imi hakbesik ba mundu nia juiz, Nai Maromak rasik. Imi hakbesik ba ema diak nia klamar, tanba sira hetan ona kmanek nia roman. Imi hakbesik ba Jesus, moruk foun nia laletek. Liafuan pedasuk hirak nee hatudu mai ita katak Maromak halibur ita iha komunidade nuudar Nia oan sira neebe Nia hadomi,” katak Padre. Nee.
Padre nee dehan, iha Evanjelhu ema hatene klaru tebes katak Jesus Kristu harii komunidade apostolu ho apostolu sanulu resin rua atu hamutuk ho Jesus Kristu halao nia misaun. Jesus la moris mesak, Nia la lao mesak, maibe hamutuk ho sira neebe lao tuir Nia. Jesus haruka sira mos laos mesak-mesak, maibe haruka sira nain rua-rua atu hanorin ema ho kbiit Espiritu neebe Nia haraik ba sira. Komunidade apostolu hatudu importansia moris komunidade atu servisu hamutuk, fo hanoin malu, hametin liu tan unidade no haburas espiritu kolaborasaun ba misaun nuudar misaun konjuntu neebe Maromak entrega ba sira. Depois, halao sira nia misaun sira fila fali iha komunidade.
Santu Paulo Miki no kompanheiros hatudu evidensia katak, moris komundade sai kbiit atu bele sai sasin ba povu komunidade neebe apoio malu, tulun malu iha jornada martires.
“Nee duni, mai ita hotu harii metin komunidade ho hakarak diak iha mundu neebe iha tendensia moris individual makaas. Moris komunidade ema sira ho hakarak diak sai sinal esperansa ba povu iha tinan Yubilee ida nee. Mai ita harii metin sinodalidade ba misaun iha mundu neebe kanek. Vivat Deus Unus et Trinus in Cordibus Nostris, Maromak haraik bensa ba ita,” katak Padre, Richardo.
(eme)
