DILI, STLTIMORLESTE.com – Relasiona ho kazu insendiu neebe akontese iha Laclubar, halo komunidade husi fatin nee sente triste no laran susar ba situasaun neebe akontese iha fatin refere.
Komunidade husi Suku Orlalan, Postu Administrativu Laclubar, Jose Kuilaso hatete, nuudar sidadaun no komunidade husi fatin neeba, sente triste bainhira akontese insendiu hodi rezulta maluk komunidade balun sai vitima no lakon sira nia uma no sasan uma laran. Haree ba situasaun iha rai laran, sasan hotu ohin loron folin sae makaas mais maluk balun hanoin atu estraga fali ema seluk nia moris.
“Hau sente triste tebes bainhira rona novidade ida nee, familia telefone no akompanha iha media sosial sira halo hau tanis no laran moras. Maske hau nia uma la hetan sunu, maibe haree ba familia no maluk sira neebe hetan sunu nee mak halo hau laran moras. Ita haree ba situasaun rai laran ohin loron, sasan hotu folin sae inves tur hakmatek hodi halao ida-idak nia atividade moris ho hakmatek lae, hamriik hodi hanoin estraga no sunu ema seluk nia uma too motuk uut kedas. Problema mosu nee ita la hatene mai husi neebe no se mak hahu uluk. Espera situasaun iha neeba bele hakmatek fali ona, atu nunee komunidade sira bele hakmatek,” dehan nia ba STL iha Balide, Tersa (07/07/2026).
Nia hatutan, haree ba situasaun neebe akontese hodi rezulta ema sai vitima lakon sasan no uma, husu ba parte seguransa atu bele kaptura ema sira neebe halo problema no sunu komunidade sira nia uma nee.
Nunee mos Rozalina da Silva hatete, nia hela iha Suku Orlalan mai Dili halo negosiu hodi buka moris sustenta ekonomia familia. Bainhira rona novidade nee halo nia hakfodak no laran moras tebes ho familia sira neebe hela iha neeba. Husi uma hirak neebe ahi han nee, maske nia uma la hetan sunu maibe familia balun nian mos hetan sunu hotu.
Tuir nia, situasaun nee halo ema hotu triste no sente susar tebes, tanba atu harii fali uma kiik oan ida presiza tempu no osan, neebe buat sira nee hotu halo ema laran susar. Tanba nee husu ba parte seguransa atu kaer lalais ema sira neebe mak halo problema no sunu komunidade sira nia uma.
Iha sorin seluk, Ministra Solidariedade Sosial no Inkluzaun (MSSI), Veronica das Dores no Visi Ministra Solidariedade Sosiál no Inkluzaun, Céu Brites ho ekipa hamutuk Autoridade Protesaun Sívil (APC) fo asisténsia humanitaria ba komunidade vítima insendiu iha Suku Fatumaquerec, Postu Administrativu Laclubar, Munisípiu Manatuto iha Segunda (06/07/2026).
Insendiu nee akontese hafoin konflitu entre komunidade Suku Orlalan no Suku Fatumaquerec, neebe rezulta uma hamutuk 15 mak hetan estragus, kompostu husi uma 4 (ahi-han total), uma 5 (ahi-han naton) no uma hamutuk 6 mak hetan estragus kaman.
Husi akontesimentu refere, vítima sira hamutuk uma-kain 22 mak evakua ona ba Crisaã Ágape-Cribas, no agora dadaun hetan ona apoiu emerjensia nesesidades basikas husi MSSI no APC.
Iha okaziaun nee Ministra Solidariedade Sosiál no Inkluzaun, Verónica das Dores akompaña husi Vise-Ministra MSSI, Céu Brites mos enkoraja vítima sira atu nafatin forte no iha esperansa.
“Imi la mesak, maibe konta ho ami. Halo deit orasaun no labele halo foer imi nia liman. Nafatin korajen hodi buka solusaun diak ba imi nia moris iha futuru,” dehan Ministra nee.
(dom)
