DILI, STLTIMORLESTE.com – Komunidade Aldeia Tabolo, Suku Casabauc, Postu Administrativu Tilomar, Munisípiu Covalima, husu Governu atu hadi’a estrada ne’ebé seidauk diak.
Xefi Aldeia Tabolo, Martinho Tomas hato’o pedidu ne’e ba STL liuhusi telefone husi Tabolo, Sesta nee (28/08/2026), tanba kondisaun estrada afeta atividade no moris komunidade.
“Komunidade seidauk asesu ba estrada husi Aldeia Tabolo ba Aldeia Kawauman inklui ba Colo Ama,” dehan nia.
Martinho esplika katak kondisaun estrada ne’e halo komunidade difisil atu lori sira-nia produtu agrikultura ba merkadu.
Tuir nia, problema estrada ne’e la’ós foun, tanba komunidade hasoru ona situasaun ne’e desde Timor-Leste restaura independénsia to’o agora.
Maske ekipa husi Ministériu Obra Públika (MOP) vizita ona no haree kondisaun estrada, to’o agora seidauk iha informasaun klaru kona-ba bainhira obra hadi’a estrada sei hahú.
Proposta ne’ebé komunidade submete ba Postu Administrativu Tilomar mós seidauk hetan resposta.
Aleinde difikulta ba transporte, kondisaun estrada ne’ebé aat mós kontribui ba problema inundasaun iha Aldeia Tabolo, ne’ebé akontese dala barak durante tempu udan.
“Iha Aldeia Tabolo ne’e sai album ba inundasaun akontese tinan-tinan,” informa Martinho.
Nia lamenta katak komunidade kontinua hein estrada, maibé Xefi Aldeia la iha kapasidade atu rezolve problema ne’e mesak.
“Triste, hau nia komunidade halerik ba estrada, maibé hau labele halo buat ida. Nai ulun sira mak hatene, maske MOP haree ona maibé nune’e husik hela de’it,” nia dehan.
Martinho husu Governu atu tau atensaun urjente ba hadi’a estrada iha Tabolo. Total populasaun Aldeia Tabolo hamutuk ema 787 ne’ebé hein hela solusaun ba problema transporte ne’e.
(joa)
