DILI, STLTIMORLESTE.com – Moru iha Ensinu Baziku Filial (EBF) Fatumeta seidauk diak, uza deit kalen mak taka, halo komunidade sira tama no sai iha resintu eskola refere.
Informasaun nee hatoo husi Koordenador EBF Fatumeta, Jose Manuel Guterres ba STL iha nia knar fatin, Kuarta nee (24/06/2026).
“Dezafiu neebe ami hasoru, ida mak moru eskola nian, nee halo ema husi liur tama sai husi moru kuak, ami hein katak governu liu husi ME bele tau matan ba ami, liu-liu ba ami nian moru neebe seidauk diak, ami nian moru iha parte sorin nee seidauk halo, ami didin ho kalen deit, ida nee halo komunidade sira tama sai iha resintu eskola nian,” nia esplika.
Nia dehan, ho sira nian edifisiu eskola nian, ba oin presiza atu hadia no hatama ona pedidu ba ME, husi eskola hein fali resposta husi ME, tanba ida nee mak hanesan ezijensia ida husi eskola ba Ministériu Eduksaun, oinsa mak haree asuntu ida nee, atu nunee bele fo apoiu halo konstrusaun ba sira nian eskola.
“Ami nian numeru estudantes nee barak liu, entaun ami laiha espasu para ami nian estudantes sira atu halimar, ida nee sai problema ba ami, depois ami nian edifisiu nee klot, kuandu estudantes mak tau hamutuk nee ami bok aan la diak, nee duni ami presiza atu hadia tan ami nian edifisiu ida nee ba aban bain rua, tanba ida nee ami halo pedidu ba iha parte ME, ami hein resposta husi ME,” nia afirma.
Jose dehan, pedidu nee rasik sira enkamina ona ba edukasaun, uluk nee kada sala estudantes 50, agora menus oituan, tanba fahe ba turnu tolu, nee duni kada sala 35 too 40 deit, maibe ida nee fahe ba iha turnu tolu, se karik fahe ba turnu rua nee numeru estudantes nee barak liu, sala de aula nee sufisiente hela, tanba agora fahe ba turnu tolu.
“Ami nian profesores mos sufisiente hela, balun reforma tiha ona no hirak neebe mak koloka mai hodi substitui fali iha reforma nian fatin, nee duni konaba profesores nee ami nian eskola laiha problema,” nia komenta.
Iha parte seluk, Diretor ESJ nu. 4 deSetembru Balide hatete, dala barak koalia beibeik ona asuntu ida nee iha media, tanba eskola nee komunidade hela iha laran no sira sempre uza transporte tama sai iha resintu eskola nian, oinsa halo moru neebe mak metin para labele halo movimentu iha resintu eskola nian.
“Dala barak hau sempre koalia beibeik ona asuntu ida nee iha media, tanba eskola nee komunidade hela iha laran no sira sempre uza transporte tama sai iha resintu eskola nian, oinsa halo moru neebe mak metin para labele halo movimentu iha resintu eskola nian,” tenik nia.
(jac)
