DILI, STLTIMORLESTE.com — Governu fo ona subsidiu ba kompanhia neebe fornese mina ba eletrisidade hodi garantia enerjia eletrisidade ba komunidade, maibe ikus-ikus nee komunidade triste, tanba ahi komesa mate lakan.
Seidauk iha klarifikasaun husi parte Eletrisidade konaba kauza ahi mate lakan ikus ikus nee, no meus saida mak husi par EDTL hola hodi garantia fornesimentu enerjia eletrisidade ba komunidade iha rai laran.
Fenomena ahi mate lakan ikus ikus nee laos halo komunidade triste deit, maibe preokupa ba sustentabilidade enerjia eletrisidade iha rai laran ho nia konsekuansia sira neebe povu sei hasoru, kuandu presu kombustivel kontinua sae, governu deside hasae tarifiu eletrisidade mak sei prejudika tebes povu nia moris.
Ohin loron povu dependensia ba enerjia eletrisidade, kuaze atividade uma laran nian hanesan tein, nono bee, no sel seluk presiza enerjia eletridade, tanba nee mak kuandu ahi mate, komunidade sira mura mura los, tanba eletridade nee hanesan nesesidade primer povu nian.
Timor Leste hanesan nasaun neebe dependensia ba importasaun kombustivel, presu mina neebe sae makaas iha merkadu global kauza husi funu entre Iran ho Israel no Amerika, afeta tebes ba ba povu nia moris, nee laos Timor Leste deit, maibe nasaun sira seluk sai afetadu ba presu mina iha merkadu global.
Ahi mate iha rai laran, dalaruma mos kauza husi presu mina neebe sae iha merkadu, ho ahi mate iha minutu hirak nia laran, bele poupa ona enerjia lubuk ida, maske sakrifika komsumidor sira nia sasan elektronika, tanba ahi mate lakan afeta mos ba ekipamentu elektronika sira sira hanesan jaleira, ace, komputador no ekipamentu sira seluk.
Nunee vitima makas ba eletrisidade mate lakan nee mak povu, tanba povu mak lakon osan hodi sosa pulsa, depois kuandu ahi mate lakan, sasan elektronika sira keima, povu mak lakon, parte EDTL seguru loos no laiha responsabilidade, tanba seidauk lei atu protese direitu konsumidor eletrisidade. Nunee ahi mate lakan, sasan elektronika sira aat, povu nonok deit, la ejize responsabilidade ba EDTL, hanesan instituisaun nee neebe responsabilidade ba fornesimentu eletrisidade.
Tuir Martinha Tilman, eletrisidade ikus ikus nee komesa mate lakan, mate iha tempu ida ema presiza los, hanesan kalan, lokraik, dadersan, liu liu iha domingu, nee triste los, tanba ema presiza tebes eletrisidade hodi prepara ba misa, kuandu ahi mate, nee susar los tanba bele impede ema ba misa.
“Ohin dadersan tuku lima hau hader hare ahi mate, haris iha nakukun laran, sorte bee iha hela, se bee mak laiha labele ba misa, tanba ahi mate, bainhira mak ense bee hodi haris, tempu liu ona ba misa,” dehan Martinha ba STL iha Aldeia Rai Nain, Domingu (18/4/2026).
Nia kestiona tanba sa eletrisidade komesa mate, sera tanba folin mina sae mak komesa hamate ahi ka ou tanba eviksaun sira neebe lao iha Dili laran implika ba fiu linha eletrisidade nian neebe rungu ranga.
Tuir nia sistema linha eletrisidade Timor Leste potensia ba keimadu, eviksaun neebe lao afeta ba fiu sira neebe rungu ranga, no tabele tun sae, kuandu la aranja ho didiak mak bele afeta ba keimadu.
“Ita hare iha fatin sira eviksaun nian, fiu sira tabele tun sae hela, laos uma sira deit mak tetuk ho rai, mas fiu sira mos rungu ranga. EDTL tenke tau matan ba ida nee, kuandu ahi mate, ami mak sofre,” suspira Martinha.
(god)
